އިސްލާމީ މަރުކަޒުގައި ނަމާދަށް ތިއްބާ މިސްކިތައް އަރާ ކުޑަކަމުދިޔަ މީހާގެ ބަންދަށް އިތުރު 10 ދުވަހުގެ މުއްދަތެއް ޖަހައިފިއެވެ.
މި މައްސަލައިގައި ހައްޔަރުކޮށްފައި ވަނީ 40 އަހަރުގެ ދިވެހި ފިރިހެނެކެވެ.
އެ މީހާއަށް ފުރަތަމަ މުއްދަތް ޖަހާފައިވަނީ މި މަހުގެ 5 ވަނަ ދުވަހުއެވެ. އެ ދުވަހު ޖަހާފައިވަނީ 7 ދުވަހުގެ މުއްދަތެކެވެ.
އެމީހާ ހައްޔަރުކުރި ހުކުރު މިސްކިތާއި އިސްލާމީ މަރުކަޒުގައި މީހުން ނަމާދަށް ތިއްބައި ވަދެ އެތަންތަނަށް ކުޑަކަމު ދިއުމުގެ ސަބަބުންނެވެ. އެ ދެ މިސްކިތުގެ އިތުރުން ރައީސް އޮފީހުގެ ގޭޓް ކުރިމައްޗަށް ވެސް އޭނާ ކުޑަކަމުދިޔައެވެ.
އެ މީހާ ދޫކޮށްލައިފި ނަމަ މުޖުތަމައަށް ނުރައްކާ އޮތް ކަމަށާއި މުޖުތަމައުގެ ފަރާތުން އޭނާއަށް ވެސް ނުރައްކާވެދާނެ ކަމަށް ބެލެވޭ ކަމަށް ފުލުހުން ވަނީ ބުނެފައެވެ. މީގެ އިތުރުން އޭނާގެ އާއިލާގެ ފަރާތުން ވެސް އޭނާއަށް އެއްބާރުލުން ދޭން ބޭނުން ނުވާކަމަށް ފުލުހުން ބުނެއެވެ.
ފުލުހުން މީގެ ކުރިން ބުނީ މިހާތަނަށް ބެލިބެލުމުން އެމީހާ އަކީ ނުކުޅެދުންތެރިކަން ހުންނަ މީހެއް ކަން އެނގިފައިވާ ކަމަށެވެ.
