މިހާރު އަމަލު ކުރަމުންދާ ހެއްކާ ބެހޭ ގާނޫނުގެ ބަދަލުގައި ޒަމާނާ އެކަށީގެންވާ އުސޫލުތަކާ އެއްގޮތަށް ހެއްކާ ބެހޭ ބިލު ތައްޔާރުކޮށް ރައީސް އޮފީހަށް ފޮނުވަފައިވާ ކަމަށް އެޓާނީ ޖެނެރަލް އިބްރާހިމް ރިއްފަތު ވިދާޅުވެއްޖެއެވެ.
ރިއްފަތު ވިދާޅުވީ، މިހާރު އަމަލުކުރަމުން ގެންދާ ހެއްކާ ބެހޭ ގާނޫނަކީ 1976 ގެ 7 މާއްދާގެ މައްޗަށް އޮތް އެޗެއް ކަަމަށެވެ. އޭގެ ބަދަލުގައި، ގާނޫނުގެ ރައްކާތެރިކަން ޔަގީންކޮށް ދިނުމަށްޓަކައި ޒަމާނާ އެކަށީގެންވާ އުސޫލުތައް އެކުލެވޭ ހެއްކާ ބެހޭ ބިލެއް ރަައީސް އޮފީހަށް ފޮނުވާފައިވާ ކަމަށް ރިއްފަތު ވިދާޅުވިއެވެ.
މިއަަދު ފޮނުވި ބިލްގައި ހެކީގެ ބާވަތްތަކާއި ހެކި ދަރަޖަ ކުރެވޭ ގޮތާއި ކަމެއް ސާބިތު ކުރުމަށް ހެކި ބޭނުންވާ ނިސްބަތާއި ހެކި ހުށައެޅުމާއި ބަލައިގަތުމާއި އަދި ވަޒަން ކުރުމުގައި އަމަލުކުރަން ޖެހޭ އުސޫލުތަކާއި އެ ނޫންވެސް ހެއްކާ ބެހޭ އާންމު އުސޫލުތަކާއި މިންގަނޑުތައް ކަނޑައަޅާފައި ވެއެވެ.
ބިލްގައިވާ ގޮތުން މި ގާނޫނު ހިނގާނީ ރާއްޖޭގެ އެންމެހާ ކޯޓްތަކުގައި ހިނގާ މައްސަލަތަކާއި ރާއްޖޭގެ އެންމެހާ ޓްރައިބިއުނަލްތަކުގައި ހިނގާ މައްސަލަތަކަށެވެ. ހަމައެއާއެކު ކަމާގުޅޭ ނިސްބަތަށް ކަމެއް ތަހުގީގުކޮށް ފިޔަވަޅު އެޅުމުގެ ބާރު ލިބިގެންދާ ދައުލަތުގެ އިދާރާތަކުން ތަހުގީގު ކުރާ ނުވަތަ ފިޔަވަޅު އަޅާ މައްސަލަތަކާއި ކަމާގުޅޭ ނިސްބަތައް ދައުލަތުގެ އިދާރާއަކުން ތައުދީބީ ފިޔަވަޅު އެޅުމުގެ ބާރު އޮވެގެން ބަލާ މައްސަލަތަކުގެ މައްޗަށް ވެސް މި ގާނޫނު ހިނގާނެއެވެ.
މި ބިލު ގާނޫނަކަށް ވެއްޖެ ނަމަ، ގާނޫނު ނަންބަރު 24/76 ހެއްކާބެހޭ ގާނޫނާއި، ގާނޫނު ނަންބަރު 14/72 އަންހެންުންގެ ހެކި ބަހުގެ ގާނޫނު އުވާލެވޭނެއެވެ.
