ޖަނަވާރުގެ ސިއްހަތާ ބެހޭ ބިލެއް ފާސްކޮށް އެއަށް އަމަލު ކުރުމަކީ މިވަގުތު ކުރަން ޖެހޭ ކަމެއްތޯ ސުވާލު އުފައްދާ އެކަމަށް އެތައް ބަޔަކު ޖޯކު ޖަހާނެ ކަމަށާއި ނަމަވެސް މިއީ ކޮވިޑް ބަލިން އަރައި ނުގަނެވިގެން އުޅޭ މި ދުވަސްވަރަށް ބަލާލިއަސް ވަރަށް މުހިންމު ބިލެއް ކަން ހާމަވެފައިވާ ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ، މިހާރު ކުރިއަށްދާ ރައްޔިތުން މަޖިލިޙުގެ 3 ވަނަ ދައުރުގެ ދެވަނަ ޖަލްސާގައި ސަރުކާރުގެ ފަރާތުން، ކަނޑިތީމު ދާއިރާގެ މެންބަރު އަބްދުالله ޝަހީމް އަބްދުލްހަކީމް ހުށަހެޅުއްވި ޖަނަވާރުގެ ސިއްހަތާ ބެހޭ ބިލަށް ބަހުސް ކުރައްވަމުންނެވެ.
ޝަރީފް ވިދާޅުވީ، ފުންކޮށް ވިސްނާލީމަ އެއީ މުހިންމު ކަމެއް ކަން އޭނާއަށް ވަޒަން ކުރެވުނު ކަމަށެވެ. ސަބަބަކީ އިންސާނުންގެ ސިއްހަތާ ޖަަނަވާރުންގެ ސިއްހަތާ ގުޅި ލާމެހިފައި އޮތުމުން ކަމަށެވެ. ކެއުން ބުއިމުގައި ވެސް ޖަނަވާރުންގެ މަހާއި ބިހާއި ތަކެތި އިންސާނުން ކައިބޮއެ ހަދާއިރު، އަދި ދުނިޔޭގައި ކޮވިޑް ބަލިވެސް ފެތުރިފައި ވަނީ ވެސް ޖަނަވާރެއްގެ ޒަރީއާއިން ކަމަށް ވާއިރު، މި ބިލު ފާސްވެ އަމަލު ކުރަން ފެށުމަކީ މުހިންމު ކަމެއް ކަމުގައި ދެކެވަޑައިގަންނަވާ ކަމަށް ޝަރީފް ވިދާޅުވިއެވެ.
ޖަނާވާރުންގެ ސިއްހަތާ ބެހޭ ގާނޫނެއް ހަމައެކަނި ފާސްކުރުމަކުން ނިމުނީކީ ނޫން ކަމަށް ޝަރީފް ވިދާޅުވިއެވެ. ޖަނަވާރަށް ވެކްސިނާއި ބޭސް ލިބެން އެބަހުރިތޯ ބަލަން ޖެހޭ ކަމަށާއި ރާއްޖެއަށް އެތެރެކުރަނީ ކޮންކޮން ޖަނަވާރެއްތޯ ވެސް ބަލަން ޖެހޭ ކަމަށާއި އެ ޖަަނާވާރުތަަކަށް ޖެހޭ ބަލިތަކާއި އެކަމުން އަރައިގަތުމަށް ކުރެވެން ހުރި ކަންކަމަކީ ވެސް ބަލަންޖެހޭ މުހިންމު ކަންކަން ކަމަށް އޭނާ ފާހަގަ ކުރެއްވިއެވެ.
ހަމައެއާއެކު ކެއުމަށްޓަކައި ރާއްޖެ އެތެރެކުރާ ޖަނަވާރުތަކާ ގުޅޭ ގޮތުންވެސް އުސޫލުތަކެއް ހަމަޖައްސަން ޖެހޭ ކަމަށް ޝަރީފް ވިދާޅުވިއެވެ. މީގެ އިތުރުން މިފަދަ ބިލެއް ފާސްކުރާއިރު ރާއްޖޭގައި މި އަމަލު ކުރަން ފަށާއިރު ލިބެން ހުރި ވަސީލަތްތަކަކީ ކޮބައިތޯ ވެސް ބަލަންޖެހޭ ކަަމަށް އޭނާ ވިދާޅުވިއެވެ.
މާލޭގައި ވެސް ގިނަ ގެތަކެއްގައި ޖަނަވާރު ގެންގުޅޭ އިރު، މަގުމަތީގައި ވެސް އެތައް ޖަނަވާރުންތަކަކަށް ދިވެހިން ކާންބޯން ދޭ މަންޒަރު ފެނެއެވެ. ދިވެހިންގެ ގެތަކުގައި ގެންގުޅޭ ޖަނަވާރުންތަކުގެ ތެރޭގައި ތަފާތު ވައްތަރުތަކުގެ ދޫންޏާއި، މަސްމަހާ މެއްސާއި، ބުޅަލާއި، މީދާ، މުސަޅު ފަދަ ޖަނަވާރުތައް ހިމެނެއެވެ.
އެ ޖަނަވާރުން ރަނގަޅު ސިއްހަތެއްގައި ބެހެއްޓުމަކީ މުހިންމު ކަމެއް ކަމެއް ކަމަށް ބިލު ހުށަހަޅުއްވަމުން ޝަހީމް ވަނީ ވިދާޅުވެފައެވެ. އަދި އަދި މި ބިލަކީ ޖަނަވާރު ގެންގުލޭ އަދި ޖަނަވާރު ދެކެ ލޯބިވާ ފަރާތްތަކަށް ލިބިގެން ދާނެ ވަރަށް ބޮޑު އުފަލެއް ކަމަށް ޝަހީމް ވިދާޅުވިއެވެ. މި ވަގުތު ވެސް ރާއްޖޭގައި ޖަނަވާރަށް ސިއްހީ ފަރުވާ ދެމުންދާ އިރު އެކަން އެކަށީގެންވާ ވަރަށް ނުކުރެވޭ ކަމަކީ ފާހަގަ ކޮށްލެވޭ ކަމެއް ކަމަށް ޝަހީމް ވިދާޅުވިއެވެ.
