ށ. ފޯކައިދޫ އަދި ގދ. ނަޑެއްލާ މޮނީޓަރިންގެ ހާލަތުން ނަގައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ ފޯކައިދޫ އަދި ނަޑެއްލާގެ މޮނިޓަރިން ހާލަތު އުވާލާފައި ވަނީ އެ ރަށްރަށުން ނެގި ރެންޑަމް ސާމްޕަލްތަކުގެ ނަތީޖާތައް ނެގަޓިވް ވުމާ ގުޅިގެން ކަމަށެވެ.
ނަޑެއްލާ މޮނީޓަރިންގެ ހާލަތަށް ގެނެސްފައިވަނީ ފޯކައިދޫ މޮނީޓަރިންއަށްލީތާ އެއްދުވަސްފަހުންނެވެ. މިދިޔަ ޖުލައި މަހު 12 ވަނަ ދުވަހު ފޯކައިދޫ މޮނިޓަރިން އަށް ލީއިރު ނަޑެއްލާ މޮނިޓަރިންގެ ހާލަތަށް ގެނެސްފައި ވަނީ މިދިޔަ ޖުލައި މަހު 13 ވަނަ ދުވަހުއެވެ.
މިވަގުތު މޮނިޓަރިންގެ ހާލަތުގައި އޮތީ 9 ރަށެކެވެ. އެއީ ހއ. ތަކަންދޫ، ށ. ފީވައް، މ. ކޮޅުފުށި، ރ. ދުވާފަރު، ކ ކާށިދޫ، ދ. ކުޑަހުވަދޫ، ލ. ފޮނަދޫ، އއ. ހިމަންދޫ އާއި ތ. ހިރިލަންދޫއެވެ.
މިފަހަކަށް އައިސް އަތޮޅުތެރޭގެ ބައެއް ރަށްތަކުން ރެންޑަމް ސާމްޕަލްތައް ޕޮޒިޓިވް ވަމުން ދާ މިންވަރު އިތުރު ވަމުން ދާ ކަން ފާހަގަ ކުރެވެއެވެ. އެގޮތުން ބައެއް ރަށްރަށުން މީހަކު ޕޮޒިޓިވް ކަން އެނގޭއިރު ރަށުގައި ބަލި ފެތުރި ރަށުގެ ގިނަ ބަޔަކަށް ބަލި ޖެހިފައި ވެސް އެބަ ހުއްޓެވެ. ބައެއް ފަހަރު އެ ކޭސްތަކަކީ ކަރަންޓީނު ވާ މީހުންނާ ގުޅުން ހުރި ކޭސްތަކަށް ވެސް ވެއެވެ.
