ދައުލަތުގެ މުދަލެއް ރަހުނު ކޮށްގެން ދަރަންޏެއް ނެގުމުގެ ވިސްނުން ފިނޭންސް މިނިސްޓަރު އަމީރު ނުގެންގުޅުއްވާ ކަމަށް އެ މިނިސްޓްރީން ބުނެފިއެވެ.
އަމީރު ހިމެނިވަޑައިގަންނަވާހެން ފިނޭންސް މިނިސްޓްރީގެ ވަފުދެއް ދުބާއީއަށް ފުރުމާ ގުޅިގެން އެ ދަތުރުގައި ޔޫއޭއީގެ ޑިވެލޮޕްމަންޓް ޕާޓުނަރުންނާއި ބޭންކުތަކާއި އަދި އިންވެސްޓަރުންނާ ބައްދަލު ކުރަނީ ކޮން ކަމަކުތޯ "ދަ ޕްރެސް" އިން އެހުމުން ފިނޭންސުން ބުނީ، އެ ދަތުރުގެ މައިގަނޑު ބޭނުމަކީ މެދު އިރުމަތީގެ އިންވެސްޓަރުންނާއި އޮންނަ ގުޅުން ބަދަހި ކުރުމާއި އިގްތިސޯދީ ގޮތުން ރާއްޖެއަށް ލިބިފައިވާ ކުރި އެރުމުގެ ވާހަކަ ކިޔައި ދިނުން ކަމަށެވެ.
ނަމަވެސް ރާއްޖޭގެ ބައެއް މީޑިއާތަކުގައި އަމީރުގެ އެ ދަތުރަކީ ރާއްޖޭގައި ހުރި ބައެއް ހަރުމުދާ މޯގޭޖްކޮށްގެން ލާރި ހޯދަން ކުރައްވާ ދަތުރެއް ކަމަށް ބުނެފައި ވުމާއެކު، އެވާހަކަ އަށް ފިނޭންސުން ބުނީ މިހާ ތަނަށް ދައުލަތުން މުދަލެއް ރަހުނުކޮށްގެން ދަރަންޏެއް ނަގާފައި ނުވާނެ ކަމަށާއި އަދި ކުރިއަށް އޮތް ތަނުގައި ވެސް ދައުލަތުގެ މުދަލެއް ރަހުނުކޮށްގެން ދަރަންޏެއް ނެގުމުގެ ވިސްނުން މިނިސްޓަރު އަމީރު ނުގެންގުޅުއްވާ ކަމަށެވެ.
މާލޭގެ ބިންތަކެއް ރަހުނުކޮށްގެން ދަރަންނެއް ނަގަން ނޫޅޭ ކަމަށް ފިނޭންސުން ބުނި އިރު، މީގެ ކުރިން ދަރުމަވަންތަ ހޮސްޕިޓަލް އިމާރާތް ރަހުނު ކޮށް 300 މިލިއަން ޑޮލަރުގެ ސުކޫކު ސަރުކާރުން ވަނީ ވިއްކާފައެވެ.
ފިނޭންސްގެ ދުބާއީ ދަތުރުގައި ބައިވެރިވާ ވަފުދުގައި ހިމެނެނީ ފިނޭންސް މިނިސްޓަރު އިބްރާހިމް އަމީރާއި، ފިނޭންސް މިނިސްޓްރީގެ ސްޓޭޓް މިނިސްޓަރު އިސްމާއިލް އަލި މަނިކު އާއި، ފިނޭންސް މިނިސްޓްރީގެ ޑެޕިއުޓީ މިނިސްޓަރު އަހްމަދު އީމާން މޫސާގެ އިތުރުން ޗީފް ޑެޓް މެނޭޖްމެންޓް އެގްޒެކްޓިވް މަރިޔަމް އަބްދުލް ނާސިރް އާއި ޗީފް ފައިނޭންޝިއަލް ބަޖެޓް އެގްޒެކެޓިވް އަހްމަދު ސަރުވަޝް އާދަމް އަދި އެމްއެމްއޭގެ ޑެޕިއުޓީ ގަވަރުނަރު އަހްމަދު އިމާދު ހިމެނެއެވެ.
ފިނޭންސް މިނިސްޓްރީން ބުނީ، އެ ދަތުރަކީ 5 ދުވަހުގެ ދަތުރެއް ކަމަށެވެ. މިރޭ ފުރި ވަފުދު މާލެ އަންނާނީ މި މަހުގެ 10 ވަނަ ދުވަހު ކަމަށް އެ މިނިސްޓްރީން ބުނެއެވެ.
ކޮވިޑާ ގުޅިގެން ރާއްޖޭގެ އިގްތިސޯދަށް ނޭދެވޭ އަސަރުތަކެއް ކޮށްފައިވާ މި ދަނޑިވަޅުގައި ސަރުކާރުން ދަރަނި ނަގަމުންދާ މައްސަލައިގައި ގިނަ ބަޔަކު އަންނަނީ ފާޑު ކިޔަމުންނެވެ.
ފިނޭސް މިނިސްޓަރު އަމީރު އެބޭފުޅާ ދައްކާ ވާހަކަތައް ބައެއް މީހުން ގަބޫލު ކުރިނަމަވެސް އަޅުގަނޑު ގަބޫލެއް ނުކުރާނަން.،.،އެއީ ދަރުމަވަންތަ ހޮސްޕިޓަލްވެސް އެހެރީ 300 މިލައައް.،.،ޑޮލަރަށް ވިއްކާލާފަ.، އެކަމަކު ބުނެފާ ނުވިއްކަމޭ. ،މިހިރީ މިބޭފުޅުން ހައްދަވާ އިތުރުފުޅު.،.،ތަންތަން ވިއްކާގެންވެސް ރުފިޔާ ހޯދަ އޭރުން.،އަންނަމަހުވެސް މުއައްޒިފުންނަށް މުސާރަ ދެވޭނީ.،.، އަޅުގަނޑުގެ ހިތަށް އަރަނީ.،.،މި ފަސް އަހަރު ނިއުމަކަށް ދާއިރު ރަތްޔިތުން ވެސް ތިބޭނީ.، ރަހުނު ގޮތުގައި ވިކިފަ. ރައީސް ސޯލިހުއަށް.،.، ސާބަސް.