4 ދުވަސް ފަހުން ގއ.ވިލިނގިލި އަނެއްކާވެސް މޮނީޓަރިންގެ ހާލަތަށް ގެނެސްފިއެވެ.
ކޮވިޑް ކޭސްއެއް ވިލިނގިލިން ފެނި އެރަށް މޮނިޓަރިން ހާލަތަށް އަނެއްކާވެސް ލައިފާ ވަނީ މިއަދު ކަމަށް އެޗްޕީއޭއިން ވަނީ ބުނެފައެވެ.
ވިލިނގިލިން ކޮވިޑް ކޭސްއެއް ފެނި އެރަށް މޮނިޓަރިންގައި އޮންނަތާ 72 ދުވަސް ފަހުން އެ ހާލަތު އުވާލާފައި ވަނީ މިދިޔަ އަންގާރަ ދުވަހުއެވެ. ވިލިނގިލިން މީގެ ކުރިން ޖުމްލަ 178 މީހަކު ކޮވިޑަށް ޕޮޒިޓިވިއިރު އެ ރަށް މޮނިޓަރިން ހާލަތުން ނެގި އިރު އެކްޓިވް ކޭސްތަކުގެ އަދަދު އުޅުނީ 5 ގައެވެ.
ކޮވިޑް ބަލިމަޑުކަން ރަށުގައި ފެތުރެމުން އަންނަ އިރު މިހާރު މޮނިޓަރިންގެ ހާލަތަށް 13 ރަށެއް ވަނީ ލާފައެވެ. އެއީ ހއ. ތަކަންދޫ، ހއ. ދިއްދޫ ހދ. ކުޅުދުއްފުށި، ށ. ފޯކައިދޫ، ށ.ފީވައް، މ. ކޮޅުފުށި، ދ. ކުޑަހުވަދޫ، ރ. ދުވާފަރު، ކ ކާށިދޫ، ގއ. ކޫއްޑޫ، ގއ.ވިލިނގިލި އަދި ގދ. ނަޑެއްލާ އާއި ފުވައްމުލަކެވެ.
މިފަހަކަށް އައިސް، އަތޮޅުތެރޭގެ ބައެއް ރަށްތަކުން ރެންޑަމް ސާމްޕަލްތައް ޕޮޒިޓިވް ވަމުން ދާ މިންވަރު އިތުރު ވަމުން ދާ ކަން ފާހަގަ ކުރެވެއެވެ. އެގޮތުން، ބައެއް ރަށްރަށުން މީހަކު ޕޮޒިޓިވް ކަން އެނގޭއިރު، ރަށުގައި ބަލި ފެތުރި، ރަށުގެ ގިނަ ބަޔަކަށް ބަލި ޖެހިފައި ވެސް އެބަ ހުއްޓެވެ. ބައެއް ފަހަރު އެ ކޭސްތަކަކީ ކަރަންޓީނު ވާ މީހުންނާ ގުޅުން ހުރި ކޭސްތަކަށް ވެސް ވެއެވެ.
