މާލެސިޓީން 732 ބިޔަރު ދަޅާއެކު ދިވެއްސަކު ހައްޔަރު ކޮށްފިއެވެ.
ފުލުހުން ބުނީ މި މީހާ ހައްޔަރު ކޮށްފައި ވަނީ ގާނޫނާއި ގަވާއިދާ ހިލާފަށް މާލެއަށް ބަނގުރާ އެތެރެކޮށް ބަނގުރާގެ ވިޔަފާރި ކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މާލޭގައި ހިންގި އޮޕަރޭޝަނެއްގައި މާލޭގެ ގެ އަކާއި ގަރާޖެއް ބަލައި ފާސްކުރިއިރު ކަމަށެވެ.
މި އޮޕްރޭޝަން ރޭ ހިންގައިފާ ވަނީ ޑްރަގް އެންފޯސްމަންޓް ޑިޕާޓްމަންޓާއި ޑްރަގް އިންޓެލިޖެންސް ގުޅިގެންނެވެ.
ފުލުހުން އިތުރަށް ބުނީ މި މައްސަލައާ ގުޅިގެން 35 އަހަރުގެ ދިވެހި ފިރިހެނަކު ހައްޔަރުކޮށް ޑްރަގް އެންފޯސްމަންޓް ޑިޕާޓްމަންޓުން މައްސަލަ ދަނީ ތަހުގީގު ކުރަމުން ކަމަށެވެ.
ދާދި ފަހުން މިދިޔަ ޖޫން މަހުގެ ތެރޭގައި ހުޅުމާލެ ޕެޓްރޯލް ޖެޓީގައި އޮތް ޑިންގީއަކުން ޓެކްސީއަކަށް ބަނގުރާ ކޭސްތަކެއް އަރުވާކަމަށް ފުލުހުންނަށް ލިބުނު މައުލޫމާތަކާ ގުޅިގެން ހުޅުމާލެއިން ޓެކްސީއެއް ހުއްޓުވާ ބަލާ ފާސްކުރިއިރު 48 ދަޅު ބިޔަރު އެ ޓެކްސީއިން ވަނީ ފެނިފައެވެ. އެ މައްސަލައާއި ގުޅިގެން ފުލުހުން ވަނީ ތިން މީހަކު ހައްޔަރު ކޮށްފައެވެ.
އެކި މައްސަލަތަކުގައި ފުލުހުންގެ ބެލުމުގެ ދަށުގައި ހުރި ގިނަ އަދަދެއްގެ ބަނގުރާ ވަނީ ނައްތާލުމުގައި އަމަލުކުރާ ގޮތުގެ ގަވާއިދުގެ ދަށުން މިދިޔަ މަސް ތެރޭގައި ދޫނިދޫގައި ނައްތާލާފައެވެ.
މީގެ ކުރިންވެސް ފުލުހުންނަށް ލިބޭ އެފަދަ ބައެއް މައުލޫމާތު ތަކާ ގުޅިގެން ހިންގާ އޮޕަރޭޝަންތަކުގައި ވަނީ އުޅަނދުފަހަރު ޗެކްކޮށް ބަނގުރާ ފުޅި ފަދަ އެއްޗެހި ފުލުހުންގެ ބެލުމުގެ ދަށަށް ގެނެސްފައެވެ.
