ހުސްވެފައިވާ އޮޑިޓާ ޖެނެރަލްގެ މަގާމަށް ގ. އައިފާ، ހުސައިން ނިޔާޒީ އައްޔަނުކުރަން ރައްޔިތުންގެ މަޖިލީހުން ރުހުން ދީފިއެވެ.
ނިޔާޒީއަށް ރުހުން ދިނުމާ މެދު މަޖިލީހުގެ މެންބަރުންނަށް ފެނިވަޑައިގަންނަވާ ގޮތަކަށް ވޯޓު ދެއްވުމަށް ރިޔާސަތުން ހުޅުވާލުމުން ނިޔާޒީ އަށް ރުހުން ދޭން ފާސްވީ ވޯޓުގައި ބައިވެރިވެވަޑައިގެންނެވި 63 މެންބަރުންގެ އިއްތިފާގުންނެވެ.
އޮޑިޓާ ޖެނެރަލްގެ މަގާމަށް ހުސެއިން ނިޔާޒީ އައްޔަން ކުރަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުވީ މިދިޔަ ޖޫން މަހުގެ 30 ވަނަ ދުވަހުއެވެ. އެއީ ކުރިން އެ މަގާމުގައި ހުންނެވި ހަސަން ޒިޔަތު އެމްއެމްޕީއާރުސީގެ ހިޔާނާތުގެ ފައިސާ ލިބުނު މީހުންގެ ލިސްޓުގައި އޭނަގެ ނަން އޮތުމުން ތަހުގީގަށް އެއްބާރުލުން ދޭކަމަށް ވިދާޅުވެ މަގާމުން އިސްތިއުފާ ދެއްވުމުންނެވެ. ނިޔާޒީގެ މައްސަލަ ދިރާސާ ކުރި މާލިއްޔަތު ކޮމިޓީން ވެސް ވަނީ އޭނާ އަށް ރުހުން ދޭން ފާސްކޮށްފައެވެ.
މި ވަގުތު ހުސެއިން ނިޔާޒީ ހުންނެވީ އެސިސްޓެންޓް އޮޑިޓާ ޖެނެރަލްގެ މަގާމުގައެވެ. އޭނާ އެ އޮފީހުގައި މަސައްކަތް ކުރައްވާތާ 15 އަހަރަށްވުރެ ގިނަ ދުވަސް ވެފައިވާ އިރު، އޭނާއަކީ އެ ދާއިރާއިން ތަޖުރިބާ ހާސިލް ކުރައްވައިގެން ހުންނެވި އިލްމީ ބޭފުޅެކެވެ.
ކޮމެޓީގައި މިއަދު މެންބަރުން ކުރެއްވި ސުވާލުތަކަށް ޖަވާބު ދެއްވަމުން ނިޔާޒީ ވިދާޅުވީ، ގާނޫނުގެ ކުރިމަތީގައި ވަކި ފަރާތަކަށް ބުރަ ނުވެ އޯޑިޓް ކުރުމުގެ ޒިންމާ އުފުލާނެ ކަމުގެ ފުރިހަމަ ޔަގީންކަން މެންބަރުންނަށް ދެއްވާ ކަމަށެވެ.
