ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކަށް ލުއިތައް ދޭން ސަރުކާރުން ނިންމާފައިވާ އިރު، ލުއިތަކުގެ ތެރޭގައި ސިނާމާތައް ހުޅުވާލަން ނިންމާފައިވާ ކަން 'ދަ ޕްރެސް' އަށް ކަށަވަރު ވެއްޖެއެވެ.
މައުލޫމާތު ލިބިފައިވާ ގޮތުގައި ސިނަމާތަކުގެ އިތުރުން ޑޭ ކެއާ ސެންތަރުތަކާއި ޓިއުޝަން ކްލާސްތަކާއި ޤުރުއާން ކްލާސްތައް ވެސް ހުޅުވާލައިގެން ހިދުމަތް ދެވޭ ގޮތަށް ބަދަލު ގެނައުމަށް ވަނީ ނިންމާފައެވެ. މި ތަންތަން ހުޅުވައިގެން ހިދުމަތް ދެވޭނީ މާދަމާއިން ފެށިގެންނެވެ. އަދި މިތަންތަން ހުޅުވަން ވާނީ އެޗްޕީއޭގެ ގައިޑަލައިނާ އެއްގޮތަށެވެ.
ސަރުކާރުން ގިނަ ލުއިތަކެއް ދޭނަ ނިންމާފައިވާ އިރު، މާލެ ސަރަހައްދުގެ ކާފިއު އުވާލައި ރެސްޓޯރަންތްތަކަށް ވެސް އާންމުން ވަދެ ޑައިންއިން ހިދުމަތް ރޭގަނޑު 11:30 ވަންދެން ދެވޭ ގޮތަށް ލުއިތައް ވަނީ ހަމަޖައްސާފައެވެ. ހަމައެއާއެކު ރަށްރަށަށް ދަތުރު ކުރުމުގައި ދެ ޑޯޒް ކޮވިޑް ވެކްސިން ފުރިހަމަ ކުރި ފަހުން 14 ދުވަސްވެފަިއވާ ފަރާތްތަަކަށް ނެގެޓިވް ޕީސީއާރް ޓެސްޓުގެ ނަތީޖާއަކާ އެކު ކަަރަންޓިން ނުވާ ގޮތަށް މޮނިޓަރިންގެ ހާލަތުގައި ނުވާ ކޮންމެ ރަށަކަށް ދަތުރު ކުރެވޭ ގޮތަށް ލުއިދޭން ވެސް ވަނީ ނިންމާފައެވެ.
މީ ގެ އިތުރުން 30 މީހުންނަށް ވުރެ އިތުރުނުވާ އަދަދަށް މީހުން އެއްވެ އުޅެވޭނެ ކަމަށާއި ހަފްލާތައް އިންތިޒާމް ކުރެވޭނެ ގޮތަށް ވެސް ލުއިދޭން ވަނީ ނިންމާފައެވެ. އަދި ކުޅިވަރުތައް ކުޅުމަށް ވެސް ވަނީ ލުއިތައް ދޭން ނިންމާފައެވެ.
ކޭސްތައް މަތިވެ ގިނަ ފިޔަވަޅުތަކެއް އަލާފައި ވަނީ މިދިޔަ މެއި މަހުގެ 26 ވަނަ ދުވަހުން ފެށިގެންނެވެ. އެޅި ފިޔަވަޅުތަކުގެ ސަބަބުން ކޭސްތައް ދަށްވެގެން ދިއުމުން ސަރުކާރުން މި އަންނަނީ ގިނަ ލުއިތަކެއް ދެމުންނެވެ.
