ހުސްވެފައިވާ އޮޑިޓާ ޖެނެރަލްގެ މަގާމަށް ގ. އައިފަ، ހުސެއިން ނިޔާޒީ އައްޔަން ކުރަން ރައްޔިތުންގެ މަޖިލީހުގެ މާލިއްޔަތު ކޮމެޓީން މިއަދު ފާސްކޮށްފިއެވެ.
އޮޑިޓާ ޖެނެރަލްގެ މަގާމަށް ހުސެއިން ނިޔާޒީ އައްޔަން ކުރަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުވީ ކުރިން އެ މަގާމުގައި ހުންނެވި ހަސަން ޒިޔަތު އެމްއެމްޕީއާރުސީގެ ހިޔާނާތުގެ ފައިސާ ލިބުނު މީހުންގެ ލިސްޓުގައި އޭނަގެ ނަން އޮތުމުން ތަހުގީގަށް އެއްބާރުލުން ދޭކަމަށް ވިދާޅުވެ މަގާމުން އިސްތިއުފާ ދެއްވުމުންނެވެ.
އެގޮތުން ހުސެއިން ނިޔާޒީ އެ މަގާމަށް އައްޔަން ކުރަން މިއަދު ފާސްކުރީ އެ ކޮމެޓީގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.
މި ވަގުތު ހުސެއިން ނިޔާޒީ ހުންނެވީ އެސިސްޓެންޓް އޮޑިޓާ ޖެނެރަލްގެ މަގާމުގައެވެ. އޭނާ އެ އޮފީހުގައި މަސައްކަތް ކުރައްވާތާ 15 އަހަރަށްވުރެ ގިނަ ދުވަސް ވެފައިވާ އިރު، އޭނާއަކީ އެ ދާއިރާއިން ތަޖުރިބާ ހާސިލް ކުރައްވައިގެން ހުންނެވި އިލްމީ ބޭފުޅެކެވެ.
ކޮމެޓީގައި މިއަދު މެންބަރުން ކުރެއްވި ސުވާލުތަކަށް ޖަވާބު ދެއްވަމުން ނިޔާޒީ ވިދާޅުވީ، ގާނޫނުގެ ކުރިމަތީގައި ވަކި ފަރާތަކަށް ބުރަ ނުވެ އޯޑިޓް ކުރުމުގެ ޒިންމާ އުފުލާނެ ކަމުގެ ފުރިހަމަ ޔަގީންކަން މެންބަރުންނަށް ދެއްވާ ކަމަށެވެ.
ރީތި މީހެއް