އެމްޑީޕީއަށް ލިބިފައިވާ ގެއްލުންތަކުގެ މައްސަލަތައް އިންތިގާލީ އިންސާފުގެ އޮފީހަށް ހުށަހަޅަން ނިންމާފައި ވާތީ އެކަމަށް ތައްޔާރުވުމަށް އެ ޕާޓިގެ މެންބަރުންނަށް ނައިބު ރައީސް މުހައްމަދު ޝިފާޒު ގޮވާލައްވައިފިއެވެ.
އެމްޑީޕީން ރޭ ބޭއްވި އެ ޕާޓީގެ ގައުމީ މަޖިލީހުގެ ޖަލްސާގައި ވާހަކަ ދައްކަވަމުން ޝިފާޒު ވިދާޅުވީ، އެމްޑީޕީއަކީ ވަރަށް ގިނަ ގެއްލުން ލިބިފައިވާ ޕާޓީއެއް ކަމަށާއި ޕާޓީގެ މެންބަރުންނާއި ޕާޓީގެ މުދަލާއި ވަސީލަތްތަކަށް އެކި ގޮތްގޮތުން އަނިޔާ ދީފައިވާ ކަމަށެވެ.
އެއީ އިންސާފު ހޯދަން ޖެހޭ ކަންކަން ކަމަށާއި އެފަދަ މައްސަލަތައް އިންތިގާލީ އިންސާފުގެ އޮފީހަށް ހުށައެޅުމަކީ މުހިއްމު ކަމެއްގެ ގޮތުގައި އޭނާ ސިފަކުރެއްވިއެވެ. އަދި އެ މަސައްކަތް ކުރުމާ ގުޅޭގޮތުން ޕާޓީގެ ސެކްރެޓޭރިއޭޓްގެ ދެ ބައްދަލުވުމެއްގައި މަޝްވަރާ ކޮށްފައިވާ ކަމަށާއި އެ މަސައްކަތް އެމްޑީޕީގެ ހައްގުތަކާ ބެހޭ ކޮމެޓީން ކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށް އޭނާ ވިދާޅުވިއެވެ.
އެ ކޮމިޓީން ވަނީ އިންތިގާލީ އިންސާފުގެ އޮފީހަށް މައްސަލަ ހުށައެޅުމަށް ދެ މަސް ދުވަހުގެ ފުުރުސަތެއް ދީފައި ކަމަށް ޝިފާޒް ވިދާޅުވިއެވެ. އެހެން ކަމުން އެކަމަށް ތައްޔާރުވާން ޕާޓީގެ މެންބަރުންނަށް ޝިފާޒު ގޮވާލެއްވިއެވެ.
އިންތިގާލީ އިންސާފުގެ އޮފީސް އުފެއްދީ މިދިޔަ އަހަރު ޑިސެމްބަރު މަހުގައެވެ. އެ އޮފީހުގެ މަސައްކަތަކީ ރައީސް މުހައްމަދު އަމީންގެ ވެރިކަމުން ފެށިގެން ރައީސް އަބްދުﷲ ޔާމީންގެ ވެރިކަމާ ހަމައަށް ނިޒާމީ ގޮތެއްގައި ރޭވިގެން ދައުލަތުގެ އިދާރާއަކުން ނުވަތަ އެތަނުގެ ވެރިޔަކު މީހެއްގެ އިންސާނީ ހައްގަށް އަރައިގެންފައިވާ ނަމަ، އެ މައްސަލައެއް ބަލައި އިންސާފު ހޯދައި ދިނުމެވެ.
އެ އޮފީހަށް މައްސަލަ ހުށަޅަން ފުރުސަތު ދީފައި ވަނީ އަންނަ އޯގަސްޓް މަހުގެ 13 ވަނަ ދުވަހާ ހަމައަށެވެ.
ކަލޭމެންގެ ގޮވައިލުމަށް ކަލޭމެން ހިތްވަރުދީގެން ކަލޭމެން ނުކުމެ މުޅި އައްޑުއާ ހުވަދޫގައި ހުޅުޖަހައި ގައުމަށާ ގައުމުގެ އަދުލު އިންސާފަށް ދިން ގެއްލުމުގެ ބަދަލު ކޮބާ.