ހދ. ކުޅުދުއްފުށި ސިޓީގައި ޒުވާނަކު ރަހީނުކޮށް އަނިޔާކުރި މައްސަލައިގައި މިރޭ އިތުރުމީހަކު ހައްޔަރު ކޮށްފިއެވެ.
ފުލުހުން ބުނީ ކުޅުދުށްފުށީގައި މޭއި 29، 2021 ވަނަ ދުވަހުގެ ރޭ މީހަކަށް އަނިޔާ ކުރި މައްސަލައާ ގުޅިގެން މިރޭ ހައްޔަރު ކޮށްފައި ވަނީ 20 އަހަރުގެ މީހެއް ކަމަށެވެ. މި މައްސަލައިގައި ކޯޓް އަމުރުގެ ދަށުން މިއަދު ވެސް ވަނީ މީހަކު ހައްޔަރު ކޮށްފައެވެ. މިއަދު ހައްޔަރުކުރީ 19 އަހަރުގެ މީހަކެވެ. މީގެ ކުރިން މި މައްސަލައާ ގުޅިގެން ކޯޓު އަމުރުގެ ދަށުން 24 އަހަރުގެ މީހަކާއި 25 އަހަރުގެ މީހެކުވެސް ހައްޔަރު ކޮށްފައި ވެއެވެ. މި މީހުންނާ ގުޅޭ އިތުރު މައުލޫމާތެއް ފުލުހުން ދީފައެއް ނުވެއެވެ.
ފުލުހުން ބުނީ އެމައްސަލަ އިތުރަށް ފުލުހުން ތަހުގީގު ކުރަމުންދާ ކަމަށެވެ.
ރަހިނުކޮށް އަނިޔާކޮށްފައި ވަނީ ކުޅުދުއްފުށީ ރަތްފުސްގެ، އަހްމަދު އިބްރާހީމް އަށެވެ.
އާއިލާއިން ބައެއް މީޑިއާތަކަށް މައުލޫމާތު ދީފައިވާ ގޮތުގައި އޭޑީކޭ ހޮސްޕިޓަލުން އަހްމަދުގެ ބޮލުގެ އޮޕްރޭޝަނެއް ވަނީ ކޮށްފައެވެ. އެހެން ނަމަވެސް ސިކުނޑިއަށް ވަރަށް ބޮޑަށް ގެއްލުންވެފައި ވާ ކަމަށާއި އަދިވެސް އޮތީ ވެންޓިލޭޓަރުގައި ކަމަށް އާއިލާއިން ވަނީ މައުލޫމާތު ދީފައެވެ.
އަހްމަދުގެ ބޮލުގެ ނާށިގަނޑު ފުނޑު ފުނޑުވެފައިވާ ކަމަށް އޮޕަރޭޝަނަށް ފަހު ޑޮކްޓަރުންނާ ހަވާލާދީ އާއިލާއިން ވަނީ ބުނެފައެވެ. އޭގެ ސަބަބުން އޭނާގެ ފުރާނަ ސަލާމަތް ކުރުމަށް ބޮލުގެ ނާށިގަނޑު ނަގާ، އާޓިފިޝަލް ނާށިގަނޑެއް ލައްވާފައިވާ ކަމަށް ވެސް އާއިލާއިން ބުނެއެވެ.
އޭގެ އިތުރުން ސިކުނޑި ދުޅަވެފައި ވާތީ ދުޅަ ތިރިވުމުން އިތުރު އޮޕަރޭޝަނެއް ކުރުމަށް ޑޮކްޓަރުން ނިންމާފައިވާ ކަމަށް އާއިލާއިން ބުނެއެވެ.
