މިހާތަނަށް 26،300 މީހަކަށް ހައުސްހޯލްޑް ޕާމިޓް ދޫކޮށްފައިވާ ކަމަށް ޗީފް ސުޕްރިންޓެންޑެންޓް އޮފް ޕޮލިސް އަބްދުﷲ ޝަރީފް ވިދާޅުވެއްޖެއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝަރީފު ވިދާޅުވީ މިރޭ 8 ޖެހުމުގެ ނިޔަލަށް 26،300 ހައުސްހޯލްޑް ޕާމިޓް ދޫކޮށްފައިވާ ކަމަށާއި އެޕްރޫވް ނުކުރެވި ޕެންޑިންގައި 6،939 ޕާމިޓް އެބަހުރި ކަމަށެވެ.
ސަރީފް ވިދާޅުވީ ހުއްޓުމެއް ނެތި މިހާރު ވެސް އެމަސައްކަތް ކުރައްވަމުން އަންނަ ކަމަށެވެ.
މިއަދުން ފެށިގެން ތަންފީޒް ކުރަން ފަށާ ގައިޑްލައިންގެ ދަށުން ހެނދުނު 08:00 އިން ހަވީރު 04:00 އާ ދެމެދު ޒަރޫރީ ކަންކަމުގައި ބޭރަށް ނުކުންނަ އާންމު ފަރާތްތަކަށް ދޫކުރުމަށް ހަމަޖެހިފައިވާ ހައުސްހޯލްޑް ޕާމިޓްއަށް އެދޭނީ މި ލިންކު މެދުވެރިކޮށެވެ.
ކޮވިޑު ފެތުރުން ކޮންޓްރޯލު ކުރުމަށް އަޅާފައިވާ ފިޔަވަޅުތައް އިތުރަށް ހަރުކަށި ކުރުމުގެ ގޮތުން މާލެ ސަރަހައްދުގައި ހަވީރު ހަތަރަކުން ހެނދުނު އަށަކަށް ކާފިއު ހިންގަން ނިންމާ އެނޫން ވަގުތު ތަކުގައި ހުއްދަ ނެތި ބޭރަށް ނިކުމެ އުޅުން ވަނީ މަނާކޮށްފައެވެ. މިގޮތަށް ބޭރަށް ނިކުތުމަށްވެސް ކޮންމެ ގެއަކަށް ދެ ހުއްދަ ފުލުހުން ދޫކުރާނެއެވެ.
މިއާއެކު އަމިއްލަ އޮފީސްތަކުންވެސް ވީވަރަކުން މުވައްޒަފުން އޮފީހަށް ނުނެރެ ގޭގައި ބައިތިއްބައިގެން މަސައްކަތް ކުރެވޭނެ އިންތިޒާމު ހަމަޖެއްސުމަށް އެޗްޕީއޭ އިން ބާރު އަޅައެވެ.
