މިމަހު 20 ވަނަ ދުވަހު ރޭ ހުޅުމާލޭގައި އިމާރާތެއްގެ މަތިން ވެއްޓި އަނިޔާވި މީހާ ވެއްޓުމުގައި އިތުރު މީހެއްގެ ދައުރު އޮތް ކަމަށް ތަހުގީގުން މިހާތަނަށް ފާހަގަ ކުރެވިފައިވާ ނުވާ ކަމަށް ފުލުހުން ބުނެފިއެވެ.
ފުލުހުން ބުނީ ތަހުގީގުގައި މިހާތަނަށް ކުރެވުނު މަސައްކަތުން ހާދިސާ ހިނގުމުގެ 10 މިނެޓް ހާއިރު ކުރިން 6 ބުރީގެ އިމާރާތަށް އެކަނި ގޮސް ވަންނަ މަންޒަރު ސީސީޓީވީ ފްޓޭޖުން ފެންނަ ކަމަށެވެ.
އިތުރަށް ތަހުގީގަށް ފާހަގަ ކުރެވިފައިވާ ގޮތުގައި އޭނާ ވެއްޓިފައިވަނީ 6 ބުރީގެ އިމާރާތުން ޖެހިގެން ހުރި 3 ބުރީގެ އިމާރާތުގެ ޓެރެސް މައްޗަށް ކަމަށް ބެލެވޭ ކަމަށް ފުލުހުން ވަނީ ބުނެފައެވެ.
އަދި ތިރިއަށް ވެއްޓިފައިވަނީ އެ ތިން ބުރީގެ އިމާރާތުގެ މަތިން ކަމަށް ބެލެވޭ ކަމަށް ވެސް ފުލުހުން ވަނީ ބުނެފައެވެ.
އޭގެ އިތުރުން ސީސީޓީވީ ފުޓޭޖް އިންނާއި މަންޒަރު ދުށް މީހުންގެ ބަހުން އެ އިމާރާތައް ވަނުމުގެ ކުރިން ހުޅުމާލެ މަގުމަތީގައި އަޑުގަދަކޮށް އެކަނި ކޮޅު ކޮޅަށް ދުވެ އުޅެފައިވާ ކަމަށް ތަހުގީގަށް އެނގިފައިވާ ކަމަށް ވެސް ފުލުހުން ވަނީ ބުނެފައެވެ.
އެމީހާ ހޮސްޕިޓަލަށް ގެންދިޔައިރު އެއްވެސް ހޭވެރިކަމެއް ނެތްކަމަށްވެސް ފުލުހުން ބުނެފައިވެއެވެ.
ހުޅުމާލޭގެ އިމާރާތެއްގެ ތެރެއިން ވަރަށް ގިނަ ލޭތަކާއެކު ވެއްޓިފައި އޮތް މީހެއްގެ ވީޑިއޯ ވެސް ވަނީ ދައުރުވެފައެވެ.
