ވިލިމާލެ ފޮގް ކުރަމުންދާ ކަމަށް މާލެ ސިޓީ ކައުންސިލުން ބުނެފިއެވެ.
ވިލިމާލެ ފޮގް ކުރަން ފަށާފައިމިވަނީ މިދުވަސްކޮޅަކީ ވިއްސާރަ ދުވަސްކޮޅަކަށް ވެފައި، މަދިރި އާލާވުން ހުއްޓުވުމަށްޓަކައެވެ.
ސިޓީ ކައުންސިލުން ވަނީ މަދިރި އާލާވުން ހުއްޓުވުމަށްޓަކައި ރައްޔިތުންގެ އެއްބާރުލުމަށް ވެސް އެދިފައެވެ. އެގޮތުން، ގޭގައި ތިބެ މަދިރި އާލާވެދާނެ ފަދަ ތަންތަން ނައްތާލުމަށް މާލެ ސިޓީ ކައުންސިލުން ވަނީ މީގެ ކުރިން އިރުޝާދު ދީފައެވެ.
އޭގެ އިތުރުން ސިޓީ ކައުންސިލުން ވަނީ މާލޭގެ ހުރިހާ މަގުތައް ދޮވެ ޑިސްއިންފެކްޓް ކުރަން ނިންމާފައެވެ. އަދި މާލޭގެ މަގުތަކުގެ އިތުރުން ހުޅުމާލެއާ ވިލިމާލޭގެ މަގުތައްވެސް ސާފުކުރަން ސިޓީ ކައުންސިލުން ވަނީ ނިންމާފައެވެ.
މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެފައިވަނީ އެންމެ ފުރަތަމަ ސާފުކުރަމުންދާނީ އެންމެ ގިނައިން މީހުން ބޭނުންކުރަމުންދާ މަގުތަކާއި ސަރަހައްދުތައް ކަމަށެވެ.
އެގޮތުން އެންމެ ގިނަ މީހުން އެއްވެ އުޅޭ ސަރަހައްދުތައް ކަމަށްވާ ހުރިހާ މާރުކޭޓުތައް ކައިރީއާ، ފެރީ ޓާމިނަލްތަކާ، އަދި މަގުތަކުގެ ތެރެއިން އައިޖީއެމްއެޗް ހުންނަ ކަނބާ އައިސާރަނި ހިނގުން ހިމެނެއެވެ.
