ގެއްލިގެން ހޯދަން އިއުލާން ކުރި ހދ. ނޮޅިވަރަންފަރު، މޯނިންގްސަން، މިސްބާހު މުހައްމަދު 25، ހުރީ ރާއްޖޭން ބޭރުގައި ކަމަށް ފުލުހުން ބުނެފިއެވެ.
ފުލުހުން ބުނީ މިދިޔަ ނޮވެމްބަރު މަހުގެ 19 ވަނަ ދުވަހު މިސްބާހު ރާއްޖެ އިން ފުރާފައިވާ ކަމަށާއި އަދި އޭގެ ފަހުން އޭނާ ރާއްޖެ އައިސްފައި ނުވާ ކަމަށް އިމިގްރޭޝަނުން މައުލޫމާތު ދީފައިވާ ކަމަށެވެ.
މައުލޫމާތު ލިބިފައިވާ ގޮތުގައި އޭނާ ފުރައިގެން ދިޔައީ ދުބާއީއަށެވެ.
ފުލުހުން އޭނާ ހޯދަން އިއުލާނު ކޮށްފައި ވަނީ މިމަހު 14 ވަނަ ދުވަހުއެވެ.
ފުލުހުން އެދުވަހު ބުނީ އޭނާ ގެއްލިގެން ފުލުހުންނަށް އާއިލާގެ ފަރާތުން ރިޕޯޓު ކޮށްފައި ވަނީ މިދިޔަ މަހު ކަމަށެވެ. އަދި އޭނާ ހޯދުމަށް މިހާތަނަށް ކުރެވުނު މަސައްކަތުން އޭނާ ފެނިފައި ނުވާ ކަމަށް ވެސް ފުލުހުން އޭރު ބުންޏެވެ.
މައުލޫމާތު ލިބިފައިވާގޮތުގައި މިސްބާހު އަކީ މަސްތުވާތަކެތީގެ ކުށުގެ ރިކޯޑް އޮންނަ މީހެކެވެ.
