އިޒްރޭލުން ފަލަސްތީނަށް ދެމުންދާ އުދުވާނީ ހަމަލާތަކާ އެކު ފަަލަސްތީން ސުންނާފަތިވެ އެތައް މުސްލިމުންތަކެއް ހާލުގައި ޖެހިގެން ދާ މަންޒަރު ބަލަން ދިވެހިންގެ ހިތްތަކަކަށް ކުޅަދާނައެއް ނޫނެވެ. ސޯޝަލް މީޑިއާގެ އެކި ޕްލެޓް ފޯމްތަކުން ފެންނަމުން ދިޔަ މަންޒަރުތަކުން ދިވެހިންގެ ހިތް ރޮއްވާލިއެވެ. ފަލަސްތީންގެ މުސްލިމުންނަށް ޖެހިފައިވާ ހާލު ފެނުމުން ދިވެހިންގެ އުދާސްތަކާއި ޝުއޫރުތައް ބަންޑުން ކޮށްލީ މުސްލިމުންނަކީ އެއްބައެއްކަން ދޭހަ ކޮށްދެމުންނެވެ.
އެގޮތުން މަދު ޒުވާނުންކޮޅެއް އެކުވެގެން ޓްވިޓާގައި ގްރޫޕެއް ހަދައި ފަލަސްތީނާ އެއްކޮޅަށް އަޑުއުފުލާ ޕޯސްޓްތަކެއް ޖަހަން ފެށިއެވެ. ކުޑަ ވަގުތު ކޮޅެއްގެ ތެރޭގައި އެ ގްރޫޕަށް ގިނަ ބަޔަކު ސަމާލުކަން ލިބި އެ ޒުވާނުންނާ އެއްބައިވެ އެ ޓީމްގެ މެންބަރުން އިތުރުވެގެން ދިޔައެވެ. އެ ހިސާބުން އަމިއްލައަށް ކުޑަ ބަޖެޓެއްގައި ފަލަސްތީނާ އެކު ރާއްޖެ އޮތްކަން ދައްކުވައި ދިނުމަށްޓަކައި އިވެންޓެއް ބާއްވަން އެ ޒުވާނުންގެ މެދުގައި ވާހަކަ ދެއްކިއެވެ.
ގިނަ ބައެއްގެ ތާއީދު އެކަމަށް ލިބިގެން ދިޔަ އިރު އެ އިވެންޓް ބާއްވަން ޖެހުނީ ރާއްޖޭގައި ކޮވިޑް ބަލި ހަލުވި ކަމާ އެކު ފެތުރެމުން ދިޔަ ދުވަސްވަރެއް ގައެވެ. ނުރައްކާ ފައްތަރެއްގައި އޮތް މި ދަނޑިވަޅުގައި މާލޭގައި އަންނަނީ ކާފިއު ވެސް ހިންގަމުންނެވެ.
ހަވީރު 4 އިން ފެށިގެން ފަތިހު 4 އަށް ކާފިއު ހިންގަމުންދާތީ މި އިވެންޓް ބާއްވަން ޖެހުނީ ގޭގައި ތިބެގެން އެންމެންނަށް ބައިވެރިވެވޭ ފަދަ ފަސޭހަ ގޮތަކަށެވެ. އެގޮތުން ގޭގެ ބެލްކަނިން ނުވަތަ ކުޑަދޮރުތަކުން ބޭރަށް ނުކުމެ ރާއްޖެ އާއި ފަލަސްތީންގެ ދިދަ ވިހުރުވާލަން އެ ޓީމް އެދުނީ މިއަދުގެ ހަވީރު 4 އިން 6 އަކާ ދެމެދުއެވެ.
މި އެދުމަށް ގިނަ ބަޔަކު ވަނީ އަމިއްލައަށް އިސް ނަގައިގެން އެކި ސައިޒުގެ ދިދަތައް ފަހާފައެވެ. އެއްބަޔަކު ދިދަ ޕްރިންޓްކޮށްފައިވާ އިރު އަނެއް ބަޔަކު ވަނީ ކަރުދާހުގައި ދިދަ ކުރަހާފައެވެ. އަދި ބައެއް މީހުން ދިދަ ފަހާފައި ވެސް ހުއްޓެވެ. އޭގެތެރެއިން ބައެއް ފަރާތްތަކުން ދިދަ ހަދިޔާ ކޮށްފައިވާ ކަން އެ ޓީމުން އުފަލާއެކު ފާޙަގަ ކުރެއެވެ. އަދި މިފަދަ ގޮތަކަށް އެހީތެރިކަން ފޯރުކޮށްދިނުމަށް އަމިއްލައަށް އިސްނަގައިގެން ބަޔަކު އެޓީމާ އެކު ވުމަކީ ދިވެހިންގެ ހިތްތަކުގައި ފަލަސްތީނަށް ލޯބި އޮތް މިނަވަރު ދައްކުވައިދިން ކަމެއްގެ ގޮތުގައި އެ ޓީމުން ދެކެއެވެ.
ބައެއް އުސް އިމާރާތްތަކުގައި ދިގަށް ވާނެ ހެން ފަލަސްތީންގެ ބޮޑު ދިދައެއް ވައްޓާލާފައި އޮތް އިރު ބައެއް މަގުތަކުގައި ވެސް ބެނާ އެއްހެން ފަލަސްތީންގެ ދިދަތައް ވަނީ ދަމާފައެވެ. ހަމައެއާއެކު ބެލްކަނިތަކުގައި މެދު ސައިޒުގެ ދިދަ ދަމާފައި ހުރި އިތު ކުދި ދިދަތައް ވެސް އެއްފައްޗަކަށް ދަމާފައި ހުރި ގެތައް ވެސް މަދެއް ނޫނެވެ.
ކޮވިޑްގެ ސަބަބުން ބޭރަށް ނުކުމެ އުޅޭ އިރު މާސްކް އަޅަން މިހާރު އޮންނަނީ މަޖުބޫރު ކަމަކަށް ވެފައެވެ. އެހެން ކަމުން ގޭގޭގެ ދޮރުމައްޗަށް ނުކުމެ އުޅުނު ބައެއް މީހުން މާސްކް އަޅައިގެން އުޅުނީ ވެސް ފަަލަސްތީންގެ ދިދައިގެ ކުލަތައް ބޭނުން ކޮށްގެންނެވެ. ހެދުން އެޅުމުގައި ވެސް ގިނަ ބަޔަކު އެ ކުލަަތައް ބޭނުންކޮށްފައިވާ ކަން ފަހާގަ ކޮށްލެވެއެވެ.
މަގުމަތިން ބަލާލި ކޮންމެ ދިމާލަކުން ވެސް ފެންނަމުން ދިޔައީ ހަތަރު ކުލައެވެ. ކަލާއި ހުދާއި ރަތާއި ފެއްސެވެ. ދިވެހިންގެ ދިދައިގައި ވެސް ހިމެނޭ ތިން ކުލައަށް އިތުރު ވަނީ ކަޅު ކުލައެވެ.
މަގުތަކަށް ނުކުމެ އުޅުނު ކުޑަކުދިން ދިދަ ވިހުރާލަމުން ބުނަނީ "އައި ލަވް ފަލަސްތީން" އެވެ. މަގުތަކުގައި އުޅުނު ޒުވާނުން ބުނީ "ފްރީ ފަލަސްތީން، ދިވެހިން ވެސް ފަލަސްތީނާ އެކު" މިހެންނެވެ.
ހުރިހާ ދިވެހިން ވެސް މިއަދު ބޭނުން ވަނީ އެއް ކަމެކެވެ. ހުރިހާ ދިވެހިން ގޮވަމުން ދަނީ އެއް އަޑަކުން އެއް ލަވައެކެވެ. ފަލަސްތީނަށް ޔަހޫދީ އިޒްރޭލުން ދެމުންދާ އުދުވާނީ ހަމަލާތައް ހުއްޓާލާށެވެ. މުސްލިމުންނަށް ދޭ އަނިޔާތައް ނިންމުމަކަށް ގެންނަން މުޅި ދުނިޔެ އެކީ އަތުކުރި އޮޅާލަމާ ހިންގާށެވެ. ދިވެހިން ވެސް މިތިބީ ފަލަސްތީނާ އެކީގައެވެ.
