އިޒްރާއީލުން ފަލަސްތީނަށް ދެމުންދާ އުދުވާނީ ހަމަލާތަކާއި ގުޅިގެން މި ވަގުތު ހާލުގައި ޖެހިފައިވާ ފަލަސްތީނާއެކު ދިވެހި ނަރުހުން ތިބި ކަން ރަމްޒުކޮށް ދިނުމުގެ ގޮތުން ނަރުހުންގެ ޕީޕީއީ ސޫޓްގައި އެ ގައުމުގެ ދިދަ އާއެކު "ފްރީ ފަލަސްތީން" ޖަހައިފިއެވެ.
ސޯޝަލް މީޑިއާގައި އާންމުކޮށްފައިވާ ނަރުހުންގެ ފޮޓޯއަށް އާންމުގެ ގިނަ ލޯތައް ވަނީ ހުއްޓިފައެވެ. ކޮވިޑް ބަލިމަޑުކަން މުޅި ދުނިޔެ ތަހައްމަލް ކުރަމުން އަންނަތާ އަހަރަކަށް ވުރެ ގިނަ ދުވަސް ގުނަމުންދާ އިރު މި ވަގުތު ކޮންމެ ގައުމެއްގެ ވެސް "ހީރޯ" އަކަށް ވެފައި ވަނީ ނަރުހުންނާއި ޑޮކްޓަރުން އަދި ފްރަންޓް ލައިންގައި މަސައްކަތް ކުރާ މީހުންނެވެ.
މިފަދަ ދަނޑިވަޅެއްގައި ދިވެހި ނަރުހުންގެ ފަލަސްތީނާއެކުގައި ތިބިކަން ދައްކުވައި ދިނުމަކީ ފަލަސްތީނަށް ހަމްދަރުދީ އާއި ލޯބި ޖެހެމުންދާ ދިވެހިންނަށް އިޒްރާއީލުން އެ ގައުމަށް ދިން ހަމަލާ ކުށްވެރިކުރަން ލިބިގެންދާ ހިއްވަރެއްގެ ގޮތުގައި ބައެއް މީހުން ސިފަ ކުރެއެވެ.
ހާލުގައި ޖެހިފައިވާ ފަލަސްތީނާ އެކު ރާއްޖެ އޮތް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވެސް ވަނީ ވިދާޅުވެފައެވެ. އަދި ރާއްޖޭގެ ސަރުކާރުން އަންނަނީ އިސްރާއިލުން ފަލަސްތީނަށް ދެމުންދާ ހަމަލާތައް ކުށްވެރި ކުރަމުންނެވެ.
ކޮވިޑްގެ ނުރައްކާ ރާއްޖޭގެ އެކިކަންކޮޅުތަކުގައި ހަލުވި ކަމާއެކު ފެތުރެމުންދާ މި ދަނޑިވަޅުގައި ދިވެހި ޒުވާނުން އިސްނަގައިގެން ވެސް އަންނަނީ ފަލަސްތީނާއެކު ރާއްޖެ އޮތް ކަން ހާމަކޯށް ދިނުމަށް އިވެންޓެއް ބާއްވަން ތައްޔާރުވަމުންނެވެ. އެ ގޮތުން މި ހާއްސަ އިވެންޓް ބޭއްވުމަށް ހަމަޖެހިފައި ވަނީ އަންނަ އަންގާރަ ދުވަހުގެ ހަވީރު 4 އިން 6 އަކަށެވެ. މާލޭ ސަރަހައްދުގައި މިހާރު އޮތް ކާފިއު ވަގުތު ކުރިއަށްދާ މި ހަރަކާތުގައި ކޮނެމް ފަރާތްތަކުން ވެސް އެގެއެއްގެ ބެލްކަނިތަކުން ބޭރަށް ފަލަސްތީންގެ ދިދަ ދިއްކޮށްލާ ވިހުރާލާ ގޮތަށް ވަނީ ހަމަޖެހިފައެވެ.
ފަލަސްތީނުގެ ގައްޒާއަށް އަމާޒުކޮށް އިސްރާއީލުން ވަރުގަދަ ކޮށްފައިވާ ވައިގެ އުދުވާނީ ހަމަލާތަކުގައި، ގައްޒާއިން މަރުވި މީހުންގެ އަދަދު 100 އަށް ވުރެ މައްޗަށް ވަނީ އަރާފައެވެ. މި ހަމަލާތަކުގެ ތެރެއިން އަގުސޯ މިސްކިތާ ދިން ހަމަލާގައި ޖުމްލަ 520 މީހުން ވަނީ ޒަހަމް ވެފައެވެ.
