އައްޑޫ ސިޓީގެ ހުރިހާ ރަށެއްގައި މިއަދުން ފެށިގެން ޖަމާއަތުގައި ނަމާދުކުރުން ހުއްޓާލުމަށް އިސްލާމިކް މިނިސްޓްރީން އަންގައިފިއެވެ.
އިސްލާމިކް މިނިސްޓްރީން ބުނީ، މި ގޮތަށް ފިޔަވަޅު އަޅާފައި ވަނީ އައްޑޫގައި އަނެއްކާވެސް ކޮވިޑް ކޭސްތައް ފެނުން އިތުރުވެފައި ވާތީ ރައްކާތެރިކަމުގެ ގޮތުން އަޅާ ފިޔަވަޅެއްގެ ގޮތުގައި ކަމަށެވެ.
އައްޑޫން ކޮވިޑް ކޭސްތައް ފެނުން އިތުރުވަމުން ދާތީ މި މަހުގެ އެއްވަނަ ދުވަހުން ފެށިގެން އައްޑޫއަށް އަރާ ފޭބުން ވަނީ މަނާކޮށްފައެވެ. ހަމައެއާއެކު މިހާރު ވަނީ ހަވީރު 6:00 އިން ފަތިހު 4:00 އަށް ކާފިއު ހިންގަން ފަށާފައެވެ.
އައްޑޫ އެމަޖެންސީ އޮޕަރޭޝަން ސެންޓަރު (އީއޯސީ) އިން ވެސް މިހާރު ވަނީ ކޮވިޑުން ރައްކާތެރިވުމަށް އައްޑޫގައި ހާއްސަ ފިޔަވަޅުތަކެއް އަޅާފައެވެ. އެގޮތުން ކާފިއު ގަޑީގައި އެއްވެސް ފަރާތަކުން ކޮންސްޓްރަކްޝަން މަސައްކަތެއް ކުރާނަމަ ހުއްދަ ނަގައިގެން ނޫނީ އެ މަސައްކަތެއް ނުކުރުމާއި، އެއް އަވަށުން އަނެއް އަވަށަށް ނުދިއުމަށް ވެސް ވަނީ އަންގާފައެވެ. އަދި ގޭގެއަށް ޒިޔާރާތް ނުކުރުމާއި، ބިދޭސީން ވެސް ގޭގެއަށް ގެންގޮސް މިދުވަސް ވަރު މަސައްކަތް ނުކުރުވުމަށް ވެސް ވަނީ އަންގާފައެވެ.
އައްޑޫ އެމަޖެންސީ އޮޕަރޭޝަން ސެންޓަރު (އީއޯސީ) އިން އާންމުކޮށްފައިވާ ކޮވިޑްގެ ތަފާސް ހިސާބުތަކަށް ބަލާއިރު، އައްޑޫގައި ކޮވިޑް 19 އަށް ޕޮޒިޓިވް ވެފައިވާ 97 މީހަކު މިވަގުތު ވެސް ދަނީ ފަރުވާ ހޯދަމުންނެވެ. އައްޑޫގެ އެކި ރަށްތަކުން އިއްޔެ ވަނީ 15 މީހަކު ކޮވިޑަށް ޕޮޒިޓިވް ވެފައެވެ.
މިވަގުތު އެންމެ ގިނަ ކޮވިޑް ކޭސްތައް ފެންނަމުން ދަނީ އައްޑޫގެ ހުޅުދޫންނެވެ. އެރަށުގައި 52 މީހަކު މިބައްޔަށް ފަރުވާ ހޯދަމުންދާ އިރު ހިތަދޫގައި 27 މީހަކާއި މީދޫގައި 11 މީހަކު އަދި މަރަދޫފޭދޫގައި އެކަކު މިވަގުތު ފަރުވާ ހޯދަމުންދާ ކަމަށް މައުލޫމާތު ލިބެއެވެ.
