ފަލަސްތީނާއި އިސްރާއީލުގެ ފުލުހުންނާ ދެމެދު ގުދުސްގައި ހިންގަމުންދާ ކުރިމަތިލުންތައް ދެވަނަ ރެއަކަށް ދިގުލާ ގޮސްފައި ވާއިރު، ރޭގެ ހަމަނުޖެހުންތަކުގައި ގިނަ އަދަދެއްގެ ބަޔަކު ޒަހަމްވެފައި ވާކަމަށް ހަބަރު ލިބިއްޖެއެވެ.
ކުއްލި ހާލަތްތަކުގައި ފަރުވާ ދިނުމަށް ތަމްރީނުވެފައިވާ ފަލަސްތީނުގެ ސިއްހީ އޮފިޝަލުން މައުލޫމާތު ދެއްވާ ގޮތުގައި، ރޭގެ ކުރިމަތިލުންތަކުގައި، ފަލަސްތީނުގެ 90 އެއްހާ މީހުން ވަނީ ޒަހަމްވެފައެވެ. އިސްރާއީލުގެ ފުލުހުން ބުނި ގޮތުގައި، އިސްރާއީލުންގެ 1 ފުލުހަކު ވަނީ ޒަހަމްވެފައެވެ.
ރޭގެ ހަމަނުޖެހުންތައް ހިންގާފައި ވާއިރު، ފަލަސްތީނުގެ ރައްޔިތުންނާ އިސްރާއީލުގެ ސަލާމަތީ ބާރުތަކާ ދެމެދު މިފަހަކަށް އައިސް ގިނަ އަދަދެއްގެ ކުރިމަތިލުންތަކެއް ދަނީ ހިންގަމުންނެވެ. މި ކުރިމަތިލުންތަކަކީ، ޝައިހް ޖައްރާގައި ދިރިއުޅެމުންދާ ފަލަސްތީނުގެ ރައްޔިތުން، އެމީހުންގެ ގެތަކުން ބޭރު ކުރުމަށް ޔަހޫދީ ވަޒަންވެރިން އަމާޒު ހިފުމާ ގުޅިގެން ހިންގަން ފެށި ކުރިމަތިލުންތަކެކެވެ.
ހުކުރު ދުވަހު އަލް-އަގްސޯ މިސްކިތް ސަރަހައްދުގައި ހިންގި ކުރިމަތިލުންތަކުގައި ފަލަސްތީނުގެ 200 އެއްހާ މީހުން ޒަހަމްވިއިރު، އިސްރާއީލު ފުލުހުންގެ 17 މީހަކު ޒަހަމްވި ކަމަށް މައުލޫމާތު ލިބެއެވެ.
އިރުމަތީ ގުދުސްގައި ހިންގަމުންދާ ކުރިމަތިލުންތައް ވަރުގަދަ ވަމުން އަންނައިރު، މެދުއިރުމަތީގެ މަސްރަހު ސުލްހަ ކުރުމަށް ހަރަކާތްތެރި ވަމުން އަންނަ އެމެރިކާ، ވިލާތުގެ އިއްތިހާދު، ރަޝިއާ އަދި އދއިން ވަނީ ކަންބޮޑުވުން ފާޅު ކޮށްފައެވެ.
