އިސްރާއީލުން ވެރިވެގެންފައިވާ އިރުމަތީ ގުދުސް ސަރަހައްދުގައި ދިރިއުޅެމުން އަންނަ ފަލަސްތީނުގެ ރައްޔިތުންނާ ދެކޮޅަށް، އިސްރާއީލުގެ ސަލާމަތީ ބާރުތަކުން ދެމުންދާ ހަމަލާތައް، ފާއިތުވީ ހަފުތާތަކުގެ ތެރޭގައި ވަރުގަދަ ކޮށްފައި ވާ އިރު، ދިވެހި ސަރުކާރުން އެކަން ކުށްވެރި ކޮށްފިއެވެ.

އިސްރާއީލުގެ ޖަރީމާތައް ކުށްވެރިކޮށް ދިވެހި ސަރުކާރުން އާންމު ކުރި ބަޔާނުގައި ބުނެފައި ވަނީ، ޝައިހް ޖައްރާގައި ދިރިއުޅެމުން އަންނަ ފަލަސްތީނުގެ ރައްޔިތުން، އެމީހުންގެ ގެތަކުން މަޖުބޫރުން ނެރުމާ، އަލް-އަގްސޯ މިސްކިތުގައި، ހަތިޔާރަކާ ނުލާ، މި ރޯދަމަހު އަޅުކަން ކުރަން ތިބި މުސްލިމުންނަށް އަމާޒުކޮށްގެން ހަމަލާ ދިން ދިނުމަކީ، ބައިނަލްއަގުވާމީ ގާނޫނާ، ކަނޑައެޅިގެން ހިލާފު އަމަލެއް ކަމަށެވެ.

މި އަމަލުތަކަކީ އދގެ ސަލާމަތީ މަޖިލީހާ، އާންމު މަޖިލީހުގެ ގަރާރުތަކާވެސް ހިލާފު އަމަލުތަކެއް ކަމަށާ، މި އަމަލުތަކަކީ، ސަރަހައްދީ ހަމަޖެހުން ގާއިމު ކުރުމަށް ކުރަމުންދާ މަސައްކަތަށް ހިޔަނި އަޅުވަނިވި ކަމެއް ކަމަށްވެސް ދިވެހި ސަރުކާރުގެ ބަޔާނުގައި ފާހަގަ ކޮށްފައިވެއެވެ.

މެދުއިރުމަތީގައި ހަމަޖެހުން ގާއިމުވާން އޮތީ ވަކިވެފައިވާ މިނިވަން 2 ދައުލަތް އުފެދިގެން ކަމަށް ދިވެހި ސަރުކާރުން ބުނެއެވެ. އެގޮތުން، 1967 ވަނަ އަހަރުގެ ބޯޑަރުތަކާއެކު، މިނިވަންކަމާ އިސްތިގުލާލު ލިބިގެންވާ ދައުލަތެއްގެ ގޮތުގައި ފަލަސްތީނު އުފެދި، ވެރިރަށަކީ އިރުމަތީ ގުދުސްކަމުގައި ހަމަޖެހެން ޖެހޭ ކަމަށާ، އަދި އިސްރާއީލުގެ ދައުލަތްވެސް ސުލްހަވެރި ކަމާއެކު އޮންނަންޖެހޭ ކަމަށް ދިވެހި ސަރުކާރުގެ ބަޔާނުގައިވެއެވެ.

ފަލަސްތީނުގެ ދައުލަތާއެކު ދިވެހި ސަރުކާރު ދެމި އޮތްކަން، މި ބަޔާނުގައި ވަނީ ތަކުރާރު ކޮށްފައެވެ. އަދި ފަލަސްތީނުގެ ރައްޔިތުންގެ ކިބައިން ނިގުޅައިގަނެވިގެން ނުވާނެ ހައްގުތަކުގެ ދިފާއުގައި ދިވެހިރާއްޖެ އޮތްކަންވެސް ދިވެހި ސަރުކާރުން ވަނީ ފާހަގަ ކޮށްފައެވެ.

ހަބަރު އިސްރާއީލް ފަލަސްތީން ދިވެހި ރާއްޖެ