ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމުގައި ރައްކާތެރި ކަމުގެ ފިޔަވަޅެއްގެ ގޮތުން ބޯޑަރުތައް ބަންދުކޮށްފައި އޮތުމަށް ފަހު، މެއި 17 ވަނަ ދުވަހު ބައިނަލްއަގުވާމީ ދަތުރުތަކަށް ސައުދީ އަރަބިއްޔާ ހުޅުވާލާއިރު، އެ ގައުމަށް ދަތުރު ކުރުމަށް ހާއްސަ ހުއްދައެއް ހޯދާ، ޝަރުތުތަކެއް ފުރިހަމަ ވާންޖެހޭ ގައުމު ލިސްޓުގައި ދިވެހި ރާއްޖެ ހިމަނައިފިއެވެ.
ސައުދީ އަރަބިއްޔާގެ ދާހިލީ ވުޒާރާގެ ނިންމުމާއެކު އެ ގައުމުގެ ގައުމީ އެއާލައިން، ސައުދީ އެރޭބިއަން އެއާލައިންސްއިން ވަނީ، މި ލިސްޓުގައި 38 ގައުމެއް ހިމަނާފައެވެ. ސައުދީއަށް ދަތުރު ކުރާއިރު، އެމީހަކު ހުރި މަންޒިލަކީ، ހާއްސަ ހުއްދަތަކެއް ހޯދަން ޖެހޭ މަންޒިލެއް ތޯ ބެލުމަށާ، މި އުސޫލުތަކަކީ، ދުރާލާ އިންޒާރު ކުރުމަކާ ނުލާ ބަދަލުވާނެ އުސޫލުތަކެއް ކަމަށްވެސް ސައުދީ އެރޭބިއަން އެއާލައިންސްއިން ވަނީ ބުނެފައެވެ.
ސައުދީއަށް ދަތުރު ކުރާ ފަރާތްތަކުން، އެ ގައުމުން ހުއްދަ ދޫކޮށްފައިވާ މަރުކަޒަކުން ހަދާފައިވާ ޕީސީއާރް ޓެސްޓެއްވެސް ހަދަން ޖެހޭނެ ކަމަށް އެ ގައުމުން ވަނީ ކަނޑައަޅާފައެވެ.
ސައުދީ އެރޭބިއަން އެއާލައިންސްއިން ލިސްޓު ކުރި 38 ގައުމުގެ ތެރޭގައި، ރާއްޖޭގެ އިތުރުން، އެމެރިކާ، އިންޑިއާ، އިންޑޮނޭޝިއާ، ޕާކިސްތާން، އިރާގް، ޗައިނާ، އިނގިރޭސިވިލާތް، ބަންގްލަދޭޝް، ތުރުކީ، ސިންގަޕޫރު، ގަދަރު، އޮމާން އަދި މޮރިޝަސް ފަދަ ގައުމުތައް ހިމެނެއެވެ.
ސައުދީއަކީ ކޮވިޑް ކޮންޓްރޯލް ކުރުމަށް ރައްކާތެރިކަމުގެ ހަރިކަށި ފިޔަވަޅުތަކެއް ތަންފީޒުކޮށް، ކޮވިޑާ ދެކޮޅަށް ކާމިޔާބީތަކެއް ހޯދަމުން އަންނަ ގައުމެކެވެ.
