ކޭސް ނަންބަރުތައް މަތި، އެކަމަކު އަދި އިތުރު ފިޔަވަޅެއް އަޅާކަށް ނެތް: އެޗްޕީއޭ

ރާއްޖޭގައި ކޮވިޑް-19އަށް ޕޮޒިޓިވްވާ މީހުންގެ އަދަދުތައް ދަނީ ދުވަހެއް ދުވަހަކަށް އިތުރުވަމުންނެވެ. އެގޮތުން އިއްޔެ އަކީ ރާއްޖެއިން މި ފަހުން ކޮވިޑަށް އެންމެ ގިނަ ބަޔަކު ޕޮޒިޓިވްވި ދުވެހޭ ބުނުމަކުން ދޮގަކަށް ނުވާނެއެވެ. ޖުމްލަ 328 މީހަކާއެކު ރާއްޖޭގެ ކޮވިޑަށް ޕޮޒިޓިވްވި ނަންބަރު ވަނީ 28،588 އަށް އަރާފައެވެ.

ރެކޯޑު އަދަދަކަށް މީހުން ޕޮޒިޓިވެ ވެފައި ވާއިރު މިހަފްތާ އަދި މިދިޔަ ހަފްތާގައި ވެސް ކޮވިޑް ކޭސްތައް ވަނީ އިތުރުވެފައެވެ. އެގޮތުން މިދިޔަ ހޯމަ ދުވަހު ވަނީ 328 މީހަކު ކޮވިޑަށް ޕޮޒިޓިވް ވެފައެވެ. މިދިޔަ އާދިއްތަ ދުވަހު 253 މީހަކު ކޮވިޑް ޕޮޒިޓިވް ކޭސް ރިޕޯޓް ކޮށްފަ ވާއިރު ހޮނިހިރު ދުވަހު ވަނީ 218 ކޭސް ރިޕޯޓް ކޮށްފައެވެ. ހަމައެއާއެކު ހުކުރު ދުވަހު ވަނީ 318 ކޭސް ރިޕޯޓް ކޮށްފައެވެ.

އުފެދޭ ސުވާލަކީ ކޭސްތައް އިތުރުވަމުން ދާއިރު ވެސް އެޗްޕީއޭ ފިޔަވަޅު ނާޅާ އެތިބީ ކީއްވެތޯއެވެ.

އެކަމާ ގުޅިގެން "ދަ ޕްރެސް" އިން އެޗްޕީއޭއަށް ސުވާލު ކުރުމުން ބުނީ މާލެގައި ކޮވިޑް ކޭސްތައް އަދި 100 އިން މައްޗަށް ދިޔައީ ދެ ދުވަހު ކަމަށެވެ. އެހެން ކަމުން އަދި އިތުރު ފިޔަވަޅެއް އަޅަން ނިންމާފަ ނުވާ ކަމަށް އެޗްޕީއޭއިން ބުނެއެވެ. އަދި ހަމައެހެންމެ ރަށްރަށުގެ ޕޮޒިޓިވް ކޭސްތައް ފެންނަމުންދާތީ އެރަށްތައް މޮނީޓަރިންނަށް ލާފައި ހުންނާނެ ކަމަށެވެ.

އެޗްޕީއޭއިން ބުނީ އިތުރު ފިޔަވަޅެއް އަޅާނަމަ އަންގާނެ ކަމަށެވެ.

އެޗްޕީއޭއިން އެހެން ބުނި އިރު ފާއިތުވި ފަސް ދުވަހު ވެސް ރާއްޖޭގެ ޕޮޒިޓިވް ކޭސްތައް އުޅެނީ 200 އަށް ވުރެ މަތީގައެވެ.

އަތޮޅު ތެރޭގެ ހާލަތު ގޯސް:

ދުވަހުން ދުވަހަށް ޕޮޒިޓިވް ކޭސްތައް އިތުރުވަމުން ދާއިރު މީހުން ދިރިއުޅޭ ރަށްރަށުން ވެސް ޕޮޒިޓިވް ކޭސްތައް ފެންނަ މިންވަރު އިތުރު ވެއްޖެއެވެ. އެންމެ ފަހުން ތަފާސް ހިސާބަށް ބަލާއިރު މީހުން ދިރިއުޅޭ ރަށްރަށުން އިއްޔެ ވަނީ 198 މީހަކު ޕޮޒިޓިވް ވެފައެވެ. މިދިޔަ ހޯމަ ދުވަހު 127 މީހަކު ޕޮޒިޓިވްވި އިރު އާދިއްތަ ދުވަހު 35 މީހަކު ވަނީ މީހުން ދިރިއުޅޭ ރަށްރަށުން ޕޮޒިޓިވް ވެފައެވެ.

ގިނަ ބަޔަކު ގަބޫލު ކުރާގޮތުގައި އަތޮޅުތެރެއިން ޕޮޒިޓިވް ކޭސްތައް ފެންނަން އިތުރުވެފައި މިވަނީ އެޗްޕީއޭއިން އެހާބޮޑަށް ސަމާލުކަން އަތޮޅުތަކަށް ނުދޭތީއެވެ.

އެޗްޕީއޭއިން ރެންޑަމް ސާމްޕަލް ނެގުން މިހާރު ވެސް މާލޭ އާއި އަތޮޅުތަކުގައި ކުރިއަށް ގެންދެއެވެ. އަދި ކޮވިޑް ކޭސްތަކެއް ފެނިގެން މިހާރު އަތޮޅު ތެރޭގެ 23 ރަށެއް ވަނީ މޮނިޓަރިންގެ ހާލަތުގައެވެ.

އެޗްޕީއޭއިން ދީފައިވާ ލުއިތައް:

ކޮވިޑްގެ މި ހާލަތުގައި މާލެ ސަރަހައްދުގައި ރައްކާތެރި ކަމަށް އެޅި ފިޔަވަޅުތަކަށް އެޗްޕީއޭއިން ވަނީ ލުއި ދީފައެވެ. އެގޮތުން ކެފޭ/ރެސްޓޯރަންޓްތައް ހުޅުވާފައި ބެހެއްޓޭ ވަގުތު އިތުރުކޮށް ވެހިކަލް މަނާ ވަގުތު ވަނީ އުވާލާފައެވެ.

އެޗްޕީއޭއިން ވަނީ މާލެ ސަރަހައްދުގައި ރޭގަނޑު 11:00 އިން ފެށިގެން ފަތިހު 4:00 އަށް މަގުމައްޗާއި އާންމު ތަންތަނަށް ނުކުތުން މަނާކުރުން ބާތިލްކޮށްފައެވެ. އަދި ސިނަމާތަކާއި ފިލްމު ތިއޭޓަރުތައް ހުޅުވުމުގެ ހުއްދަ އާއި ކާބޯތަކެތީގެ ހިދުމަތް ދޭ ތަންތަން، އެކަމާގުޅޭ އިދާރާތަކުން ކަނޑައަޅާ ގޮތެއްގެ މަތީން ހުޅުވުމުގެ ހުއްދަ ވަނީ ދީފައެވެ.

ހަމައެހެންމެ ދުވުމަށް ހާއްސަ ކޮށްފައިވާ ޓްރެކްތައް ވެސް ވަނީ ހުޅުވާފައެވެ. އަދި ޔުނިވާސިޓީތަކާއި ކޮލެޖުތަކަށް ދަރިވަރުން ހާޒިރުވެގެން ކުލާސްތައް ކުރިޔަށް ގެންދިޔުން ވެސް މިވަނީ ހުޅުވާލާފައެވެ.

އޭގެ އިތުރުން އެޗްޕީއޭގެ ގައިޑްލައިންތަކާ އެއްގޮތަށް ޖިމްތަކުގައި ކަސްރަތު ކުލާސްތައް ކުރިއަށް ގެންދިއުމަށާއި އެޗްޕީއޭއިން ކަނޑައަޅައިފައިވާ ގައިޑްލައިންތަކާ އެއްގޮތަށް، ޑޭ ކެއާގެ ހިދުމަތް ދޭ ތަންތަނުން ދެމުންގެންދާ ހިދުމަތް ދިނުމަށް ވެސް ވަނީ ހުޅުވާލާފައެވެ. އަދި މިނިސްޓްރީ އޮފް އެޑިއުކޭޝަނުން ކަނޑައަޅާ ގޮތެއްގެ މަތީން، ރައްކައުތެރިކަމުގެ ފިޔަވަޅުތަކާއެކު ޕްރީސްކޫލް ތަކާއި، ނާސާރީތަކުގައި ކިޔަވައިދިނުން ހުޅުވާލާފައެވެ.