ގެއަކުން ގޭސް ފުޅިއެއް ވަގަށް ނެގި ދެ މީހަކު ހޯދުމަށް ފުލުހުން އާންމުންގެ އެހީއަށް އެދިއްޖެއެވެ.
ފުލުހުން ބުނީ، މިމަހުގެ 7 ވަނަ ދުވަހުގެ ވަގުތެއްގައި ހޭންވެރު ގެއަކުން ގޭސް ފުޅިއެއް ވަގަށް ނަގާފައިވާ މައްސަލައަކާއި ގުޅިގެން ފުލުހުންގެ ޖެނެރަލް އިންވެސްޓިގޭޝަން ޑިޕާޓްމަންޓުން ކުރަމުންދާ ތަހުގީގަށް 2 މީހަކު ހޯދަމުންދާކަމަށެވެ.
ފުލުހުން ވަނީ އެ ދެ މީހުން ގޭސް ފުޅި ވަގަށް ނަގާ ހިފައިގެންދާ މަންޒަރު ފެންނަ ވީޑިއޯއެއް އާއްމުކޮށްފައެވެ.
އާއްމުކޮށްފައިވާ އެ ވީޑިއޯގައި ދެ މީހަކު މަގުމަތިން ހިނގާފައި އައިސް ގެއެއްގެ ދޮރުކައިރީ މަޑުކުރާ ތަން ފެނެއެވެ. އަދި އިރުކޮޅެއްވަންދެން ތިބުމަށްފަހު އެތަނުން އެކަކު އެ ގޭގެ އެތެރޭގައި ބަހައްޓާފައި ހުރި ގޭސް ފުޅި ނަގައިގެންދާ މަންޒަރު ފެނެއެވެ.
ފުލުހުން ވަނީ އެ ދެ މީހުންނާބެހޭ އެއްވެސް މައުލޫމާތެއް ލިބިފައިވާނަމަ ޖެނެރަލް އިންވެސްޓިގޭޝަން ޑިޕާޓްމަންޓްގެ ނަމްބަރު 9631696 އަށް ގުޅާ އެ މައުލޫމާތެއް ހިއްސާކުރަން އެދިފައެވެ. އެ މައްސަލައިގެ އިންސިޓެންޑް ނަންބަރަކީ 483877އެވެ.
