ކޮވިޑްގެ ހާލަތު ރާއްޖޭގައި ގޯސްވަމުން ދާތީ ރައްކާތެރިކަމުގެ ފިޔަވަޅު އަޅާފައި ވޭތޯ ބަލަން ޓެކްސީތައް ޗެކް ކުރަން ފަށަފިއެވެ.
ފުލުހުން ބުނީ ކޮވިޑް ކޭސްތައް ފެންނަ މިންވަރު އަނެއްކާވެސް އިތުރުވަމުން އަންނާތީ ރައްކާތެރިކަމުގެ ފިޔަވަޅެއްގެ ގޮތުން، އެއާޕޯޓަށް ދަތުކުރާ ޓެކްސީ/ވެހިކަލްތައް އެޗްޕީއޭގެ މިންގަނޑުތަކާ އެއްގޮތަށް ރައްކާތެރި ކަމުގެ ފިޔަވަޅު އަޅާފައިވޭތޯ ބެލުމަށް ފުލުހުން ހަރަކާތްތެރިވަމުން ދާނެ ކަމަށެވެ.
އެގޮތުން ހުޅުލެއަށް ދިއުމަށް ހުއްދަ ދެވޭނީ ހަމައެކަނި މިންގަނޑަށް ފެތޭ އުޅަނދުތަކަށް ކަމަށް ވެސް ފުލުހުން ވަނީ ބުނެފައެވެ.
އޭގެއިތުރުން މާލެއާއި ހުޅުމާލޭގައި ދުއްވާ ޓެކްސީ އާއި އުޅަނދުތައް ޗެކް ކުރަމުން ދާނެ ކަމަށް ވެސް ފުލުހުން ވަނީ ބުނެފައެވެ.
ފުލުހުން ވަނީ މި ދަނޑިވަޅުގައި، މާސްކް އެޅުމަށާއި ގައިދުރުކަން ބެހެއްޓުމަށް ހާއްސަ ސަމާލުކަމެއް ދީ، އެޗްޕީއޭގެ މިންގަނޑުތަކާ އެއްގޮތް ވާގޮތުގެ މަތިން އަމަލުތައް ބެހެއްޓެވުމަށް ހުރިހާ އެންމެނަށް ވެސް އިލްތިމާސް ކޮށްފައެވެ.
ކޮވިޑް ކޭސްތައް ދުވަހުން ދުވަހަށް އިތުރުވަމުން ދާއިރު އިއްޔެ ވެސް އިތުރު 328 މީހަކު ވަނީ ކޮވިޑަށް ޕޮޒިޓިވް ވެފައެވެ. އެއީ މާލެ ސަރަހައްދުން ޕޮޒިޓިވް ވި 167 މީހަކާއި، ހިންގަމުން ދާ ރިސޯޓުތަކުން 10 މީހަކާއި މީހުން ދިރިއުޅޭ ރަށްރަށުން ޕޮޒިޓިވް ވި 127 މީހަކާއި އިންޑަސްޓްރިއަލް ޕޮޒިޓިވް ވި 24 މީހެކެވެ.
