ކޮވިޑް-19 ގެ ސަބަބުން އަޑިއަޅަލާފައިވާ ރާއްޖޭގެ އިގްތިސޯދު ކޮޅަށް ޖަހާ އެކަށޭނަ ފިޔަވަޅުތައް އަޅައި ކުރީގެ ހާލަތަށް ދިއުމަށް އެހީ ވުމަށް ވޯލްޑް ބޭންކުން އޮތީ ތައްޔާރަށް ކަމަށް ވޯލްޑް ބެންކުން ރާއްޖެ އާއި ނޭޕާލް އަދި ސްރީ ލަންކާ އަށް ކަނޑައަޅާފައި ހުންނަވާ ކަންޓްރީ ޑިރެކްޓަރު ފާރިސް ހަދާދު-ޒާވޮސް ވިދާޅުވެއްޖެއެވެ.
އޭނާ މިހެން ވިދާޅުވީ ކޮވިޑް-19 ގެ ސަބަބުން ކުރިމަތިވެފައިވާ ސިއްހީ އަދި އިގްތިސާދީ ކާރިސާ އިން އަރައިގަނެ، ކުރިއަށް ވުރެ ރަނގަޅަށް އިގްތިސާދު ބިނާކުރުމުގައި އެހީތެރިވުމާ ގުޅޭ ގޮތުން ރާއްޖެއާ އެކު ވޯލްޑް ބޭންކުން ކުރިއަށްގެންދާ މަސައްކަތްތަކުގެ ދަށުން ކުރެއްވި ދަތުރުފުޅު ނިންމަލާވެއްވުމަށް ފަހު މީޑިއާ އަށް ފޮނުއްވި ބަޔާނެއްގައެވެ.
އޭނާ ވިދާޅުވީ ކޮވިޑްގެ ސަބަބުން ރާއްޖޭގައި އެޅި އެކަށޭނަ ފިޔަވަޅުތަކަށް ތަބާވުމުގެ ނަތީޖާއެއްގެ ގޮތުން، މިދިޔަ އަހަރުގެ ފަހުކޮޅުން ފެށިގެން ރާއްޖޭގެ ޓޫރިޒަމް އިންޑަސްޓްރީ ބާރަށް ކުރިއަރަން ފަށައި، ރާއްޖޭގެ އިގްތިސާދު ވެސް މިހާރު އޮތީ ކުރީގެ ހާލަތަށް ދިއުމުގެ މަގުމަތީގައި ކަމަށެވެ.
ހަދާދު-ޒާވޮސްގެ މި ދަތުރުފުޅުގެ ކުރިން، ވޯލްޑް ބޭންކުން ވަނީ ރާއްޖެ އަށް ހާއްސަކޮށް، "ޑިވެލޮޕްމަންޓް އަޕްޑޭޓް: އަ ޑިޖިޓަލް ޑޯން ރިޕޯޓް" ނެރެފައެވެ. ކޮވިޑުގެ ސަބަބުން ރާއްޖޭގެ އިގްތިސާދަށް ކުރިމަތިވެފައިވާ ނޭދެވޭ އަސަރުތަކުގެ މައްޗަށް އަލިއަޅުވާލައި ނެރުނު ރިޕޯޓުގައި ބުނެފައިވާ ގޮތުގައި 2019 އާ ބަލާއިރު މިދިޔަ އަހަރު ރާއްޖޭގެ އިގްތިސާދު ވަނީ ގާތްގަނޑަކަށް 30 އިންސައްތަ ދަށަށް ގޮސްފައި ކަމަށެވެ.
އެހެން ނަމަވެސް، ފަތުރުވެރިން ޒިޔާރަތްކުރާ މިންވަރު ބާރަށް ކުރިއަރަމުން ދިއުމާއި ފަތުރުވެރިކަމުގެ ދާއިރާގައި ކުރެވެމުން އަންނަ އިންވެސްޓްމަންޓްތަކުގެ ނަތީޖާއެއްގެ ގޮތުން، މި އަހަރު ރާއްޖޭގެ އިގްތިސޯދު 17.1 އިންސައްތައިގައި ކުރިއަރާނެ ކަމަށް ވާލްޑް ބޭންކުން ލަފާކުރެއެވެ. ހަމަ އެއާއެކު، ޑިޖިޓަލް ޓެކްނޮލޮޖީތައް މެދުވެރިކޮށް ރާއްޖޭގެ އިގްތިސޯދީ ކުރިއެރުމާއި ތަރައްގީގެ ދަތުރުގައި އިންގިލާބީ ބަދަލުތަކެއް ގެނެވިދާނެ ގޮތްތަކުގެ މައްޗަށް ވެސް ވޯލްދް ބެންކުން ބުނެއެވެ.
ދެ ދުވަހުގެ މުއްދަތަށް ކުރެއްވި ދަތުރުގައި، ވޯލްޑް ބޭންކުގެ ކަންޓްރީ ޑިރެކްޓަރު ވަނީ ވޯލްޑް ބޭންކުގެ އެހީގައި ހިންގޭ މުހިންމު މަޝްރޫއުތައް ވިލަރެސް ކުރައްވާ މިނިސްޓަރުންނާ ބައްދަލުކުރައްވާފައެވެ. އޭގެ ތެރޭގައި، މިނިސްޓަރ އޮފް ފައިނޭންސް އިބްރާހީމް އަމީރް؛ މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޒް އިސްމާއީލް؛ މިނިސްޓަރ އޮފް ނޭޝަނަލް ޕްލޭނިން، ހައުސިން އެންޑް އިންފްރަސްޓްރަކްޗަރ މުހައްމަދު އަސްލަމާއި މިނިސްޓަރ އޮފް އެންވާރަމަންޓް ޑރ. ހުސައިން ރަޝީދު ހަސަން ހިމެނިވަޑައިގަންނަވައެވެ. ހަމަ އެއާއެކު، މަރުކަޒީ ބޭންކުގެ ގަވަރުނަރު އަލީ ހާޝިމް އަދި މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީގެ އިސް ފަރާތްތަކާ ވެސް ބައްދަލުކުރައްވާފައިވެއެވެ.
ކޮވިޑުން ރައްކާތެރިވުމަށާއި، މި ބަލި ދެނެގަނެ، މި ބައްޔާ ދެކޮޅަށް މަސައްކަތްކުރުމަށް ދިވެހިރާއްޖެ އަށް އެހީތެރިވުމުގެ ގޮތުން 7.3 މިލިއަން ޑޮލަރުގެ އަވަސް އެހީގެ ޕެކޭޖެއް ވާލްޑް ބޭންކުން ވަނީ މިދިޔަ އޭޕްރީލް މަހު ދިވެހިރާއްޖެ އަށް ފޯރުކޮށްދީފައެވެ.
މި މަޝްރޫއުގެ އިތުރުން، ޑިޒާސްޓާ ރިސްކް މެނޭޖްމަންޓް ޑިވެލޮޕްމަންޓް ޕޮލިސީ ފައިނޭންސިން ވިތު އަ ކެޓެސްޓްރޮފީ ޑިފާޑް ޑްރޯޑައުން އޮޕްޝަން (ކެޓް ޑީޑީއޯ) ގެ ދަށުން 10 މިލިއަން ޑޮލަރުގެ މާލީ އެހީތެރިކަމާއި، 952،000 ޑޮލަރުގެ ޕެންޑެމިކް އިމަޖެންސީ ފެސިލިޓީއެއް ވެސް ދިވެހިރާއްޖެ އަށް ވަނީ ހަމަޖައްސައިދެވިފައެވެ.
ހަމަ އެއާއިއެކު، ކޮވިޑް-19 އާ ގުޅިގެން ކުރިމަތިވާ އިގްތިސޯދީ ހީނަރުކަމުގެ ސަބަބުން މަސައްކަތްތެރިންނަށް ކުރިމަތިވާ ދަތިތަކުން އަރައިގަތުމަށާއި ކުރިމަގުގައި ދިމާވެދާނެ ކުއްލި ހާލަތަކަށް ތައްޔާރުވުމަށްޓަކައި ދިވެހިރާއްޖޭގެ އިޖުތިމާއީ ރައްކާތެރިކަމުގެ ޕްރޮގްރާމްތައް ވަރުގަދަކުރުމަށްޓަކައި ދިވެހިރާއްޖެ އަށް އެހީތެރިވުމަށްޓަކައި ހިންގޭ 12.8 މިލިއަން ޑޮލަރުގެ އިމަޖެންސީ އިންކަމް ސަޕޯޓް ޕްރޮޖެކްޓް މިދިޔަ ޖޫން މަހު ފަށައި، މިދިޔަ ޖެނުއަރީ މަހު ވަނީ އިތުރު 21.6 މިލިއަން ޑޮލަރާއެކު އެ މަޝްރޫއުގެ މުއްދަތު އިތުރުކޮށްފައެވެ.
