ސަލްޓަންޕާކުގައި ތަރައްގީކޮށްފައިވާ ވިންޓާ ތީމް ޕާކު ހިންގާ ބަލަހައްޓަން ހަވާލުކޮށްފައިވާ ފަރާތް ހޯދަން އިއުލާނު ކޮށް 10 ދުވަހުގެތެރޭގައި އެ ކުންފުނީގެ ޑިރެކްޓަރުންގެ ތެރެއިން ބޭފުޅަކު ސިޓީ ކައުންސިލަށް ހާޒިރުވާން އަންގައިފިއެވެ.
މާލޭ ސިޓީ ކައުންސިލުން ކުރި އިއުލާނެއްގައި ބުނީ، ވިންޓާ ތީމް ޕާކު ހިންގާ ބަލަހައްޓަން މިނިސްޓްރީ އޮފް ހައުސިން އެންޑް އިންފްރާސްޓްރަކްޗާ އިން ހަވާލުކޮށްފައިވާ ޑައިމަންޑް ވިންގްސް ޕްރައިވެޓް ލިމިޓެޑްގެ ފަރާތުން ވިންޓާ ތީމް ޕާކް އޮޕަރޭޓް ކުރަމުން ނުދާ ކަމަށެވެ. އެގޮތުން ޑައިމަންޑް ޕްރައިވެޓް ލިމިޓެޑް ކުންފުންޏަށް އަންގަންޖެހޭ އެންގުންތައް ފޮނުވުމަށް އެއްބަސްވުމުގައި ބަޔާން ކޮށްފައިވާ އެޑްރެހުގައި އެ ކުންފުނީގެ އޮފީހެއް ނެތް ކަމަށާއި އެ ކުންފުންޏާ އެކު މުއާމަލާތް ކުރުމަށް ގިނަ މަސައްކަތްތަކެއް ކުރި ނަމަވެސް ކުންފުނީގެ ފަތާރުން އެއްވެސް މީހަކާ މުއާމަލާތް ކުރެވޭ ގޮތް ވެފައި ނުވާ ކަމަށް ކައުންސިލުން ބުނެއެވެ.
މިވަގުތު ޑައިމަންޑް ވިންގްސް ޕްރައިވެޓް ލިމިޓެޑް ހިންގަމުން ދަނީ ކޮން އެޑްރެހެއްގައި ކަން ކައުންސިލަށް އެނގިފައި ނުވާތީ، ވިންޓާ ތީމް ޕާކް ހިންގާ ބެލެހެއްޓުމަށް އެއްބަސްވުމުގައި ޑައިމަންޑް ވިންގްސް ޕްރައިވެޓް ލިމިޓެޑްގެ ފަރާތުން ސޮއިކޮށްފައިވާ ފަރާތް ނުވަތަ އެކުންފުނީގެ ޑިރެކްޓަރުންގެ ތެރޭގައި ހިމެނޭ ބޭފުޅަކު މިއަދުން ފެށިގެން 10 ދުވަހުގެ ތެރޭގައި ސިޓީ ކައުންސިލަށް ހާޒިރުވުމަށް އެ އިއުލާންގައި ވަނީ އަންގާފައެވެ. އެ މުއްދަތުގެ ތެރޭގައި ޑައިމަންޑް ވިންގްސް ޕްރައިވެޓް ލިމިޓެޑްގެ ފަރާތުން އެއްވެސް މީހަކު މާލޭ ސިޓީ ކައުންސިލަށް ހާޒިރު ނުވެއްޖެ ނަމަ، ވިންޓާ ތީމް ޕާކް ހިންގާ ބެލެހެއްޓުމަށް އެ ކުންފުންޏާއެކު އެކު ވެފައިވާ އެއްބަސްވުން ބާތިލް ކުރާނެ ކަމަށްވެސް ސިޓީ ކައުންސިލުން ބުނެއެވެ.
ވިންޓާ ތިމް ޕާކު ހުޅުވާފައި ވަނީ 2018 ވަނަ އަހަރުގެ ޖޫން މަހުގެ 15 ވަަނަ ދުވަހުއެވެ. އެ ޕާކުގެ ހިދުމަތް ދިން އިރު ކުޑަކުދިންނާއި އާާއިލާތަކުގެ ބޮޑު ތަރުހީބެއް ލިބިފައި ވެއެވެ. ވިންޓާ ތީމް ޕާކަށް މީހުން ވައްދާފައި ވަނީ ޓިކެޓު ވިއްކައިގެންނެވެ.
