އިތުރަށް ރުފިޔާ ޗާޕް ކުރެވޭ ގޮތަށް ދީފައި އޮތް ހުއްދަ އިތުރު އެއް އަހަރަށް ދަންމާލުމަށް ފިނޭންސް މިނިސްޓްރީ އިން ރައްޔިތުންގެ މަޖިލީހުގައި އެދުނު އެދުމާ އެއްގޮތައް އެ މުއްދަތު އިތުރުކުރަން ހުއްދަދިނުމަށް ކޮމިޓީން ނިންމައިފިއެވެ.
މަޖިލީހުގެ ތަޅުމުން އެކަމަށް ގޮތެއް ނުނިންމުމުން އެކަން ކުރެވޭނެ ގޮތެއް އޮތްތޯ ބެލުމަށް ހުރިހާ ޕާޓީއެއް އަދި އަމިއްލަ ގޮތުން މެންބަރަކު ތަމްސީލުކުރާ ގޮތަށް އެކުލަވާލި ނުވަ މެންބަރުންގެ ވަގުތީ ކޮމެޓީން އިއްޔެ ބޭއްވި ބައްދަލުވުމުގައި ވަނީ ރުފިޔާ އިތުރަށް ޗާޕުކުރަން ހުއްދަދޭން ނިންމާފައެވެ.
ކޮމެޓީ އެކުލަވާލުމަށް ފަހު އިއްޔެގެ ވަގުތެއްގައި ފެށި އެ ކޮމެޓީގެ މަޝްވަރާތަކަށް ފަހު، ފިނޭންސް މިނިސްޓްރީ އިން ރައްޔިތުންގެ މަޖިލީހުގައި އެދުނު އެދުމާ އެއްގޮތައް އެ މުއްދަތު އިތުރުކުރަން ނިންމާފައި ވަނީ އެ ކޮމެޓީގެ އަޣުލަބިއްޔަތުންނެވެ.
ކޮމެޓީގައި ހިމަނަންޖެހޭ ނުވަ މެންބަރުން ހިމަނާ މަޖިލީހުން ފާސްކުރުމާއެކު މަޖިލީހުގެ ރައީސް މުހައްމަދު ނަޝީދު ވަނީ، ކޮމެޓީގެ މަސައްކަތް ވަގުތުން ފެށުމަށް އެދިވަޑައިގެންފަައެވެ.
ހައްދެއް ނެތި ދަރަރި ނެގުމާއި ހައްދެއް ނެތި، އެމްއެމްއޭއިން އޯވަޑްރޯ ކުުރުން މަނާކޮށްފައި އޮތީ ދައުލަތުގެ ހަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ (ހ)، (ރ) އަދި (ބ) އިންނެވެ. ސަރުކާރުން 2020 ވަނަ އަހަރު ހުށަހެޅީ އެ މާއްދާތައް ސަސްޕެންޑްކޮށް، ހަތަރު ބިލިއަން ރުފިޔާ ޗާޕްކުރަން ހުއްދަ ހޯދުމަށެވެ.
އެ މުއްދަތު މިމަހުގެ 26ވަނަ ދުވަހަށް ހަމަވާތީ އެމުއްދަތު އިތުރު އެއް އަހަރަށް ދަންމާލުމަށް ފިނޭންސް މިނިސްޓްރީ އިން ރައްޔިތުންގެ މަޖިލީހުގައި އެދި ސިޓީ ފޮނުވާފައި ވަނީ މިމަހުގެ ނުވަވަނަ ދުވަހެވެ.
ފިނޭންސް މިނިސްޓަރު އަމީރު ސޮއިކުރައްވައި ރައްޔިތުންގެ މަޖިލީހަށް އިއްޔެ ފޮނުއްވި ސިޓީއެއްގައި ވިދާޅުވެފައި ވަނީ ކޮވިޑް19އާ ގުޅިގެން ކުރިމަތިވި އިގްތިސޯދީ އަދި މާލީ ލޮޅުމާ ގުޅިގެން ދައުލަތުގެ ހަރަދުތައް ހަމަޖައްސައި ހިދުމަތް ދިނުމުގެ ކަށަވަރުކަން ދިނުމަށް ދައުލަތުގެ ހަރަދަށް ޒިންމާ ވުމުގެ ގާނޫނުގެ ބައެއް މާއްދާތަކަށް އަމަލު ކުރުން ފަސްކުރުމަށް ކަނޑައަޅާފައިވާ މުއްދަތު އިތުރު ކުރުމަށް އެދޭ ކަމަށެވެ.
