މަތިންދާބޯޓަށް އަރަން ބޭނުންކުރާ އެއާ ސްޓެއާސް (ސިޑިބަރި) އަކުން ޖެހި ވެލާނާ އިންޓާނޭޝަނަލް އެއާޕޯޓުގައި އޮތް މަތިންދާބޯޓަކަށް ގެއްލުންތަކެއް ވެއްޖެއެވެ.
އެމްއޭސީއެލުން ބުނީ ގެއްލުން ލިބިފައި ވަނީ ސްރީލަންކާގެ ބޯޓަކަށް ކަމަށެވެ. އެ ހާދިސާގައި އެއްވެސް މީހަކަށް ގެއްލުމެއް ލިބިފައި ނުވާކަމަށްވެސް އެ ކުންފުނިން ބުނެއެވެ.
އެ ހާދިސާ ހިނގާފައި ވަނީ މިއަދު މެންދުރުފަހުއެވެ. އެ ހާދިސާ ހިނގާފައި ވަނީ ބޯޓަށް މީހުން އަރުވަން ބޭނުންކުރި ސިޑި ދުރުކުރަން އުޅުމުގެ ތެރޭގައި ބޯޓުގެ ފަހަތު ފިޔަގަނޑުގައި ޖެހި ގެންނެވެ. ފަހަތު ފިޔަގަނޑު ވަނީ ވަރަށް ބޮޑަށް ހަލާކުވެފައެވެ.
އެ ހާދިސާ ހިނގިއިރު ގެއްލުން ލިބުނު މަތިންދާބޯޓު އޮތީ 100 އަށްވުރެ ގިނަ ފަސިންޖަރުންނާއެކު ފުރަން ތައްޔާރު ވެފައެވެ. ލަންކާއަށް ދާން ދިވެހިންގެ އިތުރުން ގިނަ އަދަދެއްގެ ފަތުރުވެރިންވެސް ތިއްބެވެ. އޭގެ ތެރޭގައި ކުޑަކުދިންވެސް ހިމެނެއެވެ.
އެމްއޭސީއެލުން ދަނީ އެ ހާދިސާ ހިނގަން މެދުވެރިވި ސަބަބު ބަލަމުންނެވެ.
