އުތުރުތިލަފަޅާއި ހަނިމާދޫ އެއާޕޯޓްގައި އެމްއެންޑީއެފުން ބަލަހައްޓާ ސަރަހައްދަށް އަރައި ފޭބުމަށް އިންޑިއާ މީހުންގެ ހުއްދަ ހޯދަންޖެހޭ ކަމަށް ވިދާޅުވެ މާލޭ އޭރިޔާގެ ކުރީގެ ކޮމާންޑަރު، އަދި ބަޑި ގުދަނުގެ ކުރީގެ ވެރިޔާ އަހުމަދު ފަޔާޒު އަލީ (ޕާޕާ) ދެއްކެވީ ހަގީގަތާ ހިލާފް ދޮގު ވާހަކަތަކެއް ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
ޓީވީ ޝޯއެއްގައި ވާހަކަ ދައްކަވަމުން ފަޔާޒު ވަނީ ސިފައިންގެ ބެލުމުގެ ދަށުގައި އޮންނަ އުތުރުތިލަފަޅާއި ހަނިމާދޫ އެއާޕޯޓްގައި އެމްއެންޑީއެފުން ބަލަހައްޓާ ސަރަހައްދަށް އަރައި ފޭބުމަށް އިންޑިއާ މީހުންގެ ހުއްދަ ހޯދަންޖެހޭ ކަމަށް ވިދާޅުވެފައެވެ. އެ ވާހަކަތަކަށް ރައްދުދީ އެމްއެންޑީއެފުން ނެރުނު ބަޔާނެއްގައި ބުނީ، ސިފައިންގެ ބެލުމުގެ ދަށުގައި އޮތް އުތުރު ތިލަފަޅާއި ހަނިމާދޫ އެއާޕޯޓްގައި އެމްއެންޑީއެފުން ބަލަހައްޓާ ސަރަހައްދަށް އަރާ ފޭބުމަށް ބޭނުން ވާނީ އެމްއެންޑީއެފްގެ ހުއްދަ ކަމަށެވެ. އަދި އުތުރު ތިލަފަޅަކީ އެމްއެންޑީއެފްގެ މުވައްޒަފުން ތިބޭ ތަނެއް ކަމަށާއި އެ ތަނަށް އަރައި ފޭބުމަށް ބޭނުން ވަނީ ހަމައެކަނި އެމްއެންޑީއެފްގެ ހުއްދަ ކަމަށް ވެސް އެމްއެންޑީއެފުން ބުނެއެވެ.
އެ ތަންތަނަށް އަރާ ފޭބުމަށް އިންޑިއާ ސިފައިންގެ ހުއްދަ ހޯދަން ޖެހޭ ކަމަށް ވިދާޅުވެ ފަޔާޒް ދެއްކެވީ ހަގީގަތާ ހިލާފް ދޮގު ވާހަކަތަކެއް ކަމަށް އެމްއެންޑީއެފުން ބުނެއެވެ. އަދި ފަޔާޒަކީ ސިފައިންގޭގައި މަސައްކަތް ކުރެއްވި އިރު ވެސް އަހްލާގީ މައްސަލަތަކެއް ހުރުމުގެ ސަބަބުން އެކި ފަހަރު މަތިން ފިޔަވަޅު އަޅުމަށް ފަހު ވަޒީފާއިން ވަކިކޮށްފައިވާ މީހެއް ކަމަށް ވެސް އެމްއެންޑީއެފުން ބުނެފައި ވެއެވެ.
އެގޮތުން ފައްޔާޒުއަކީ ތަފާތު ގިނަ އަހުލާގީ މައްސަލަތަކެއް ޖެހި ސުލޫކީ މައްސަލަތަކެއްގައި ޑިސެންބަރު 17، 2015 ގައި ސިފައިންގެ ކާނަލެއްގެ މަގާމުން ކެޕްޓަނެއްގެ މަގާމަށް ޑިމޯޓްކޮށްފައިވާ ބޭފުޅެއް ކަމަށާއި ޖޫން 19، 2016 ގައި ކެޕްޓަނެއްގެ މަގާމުން ލެފްޓިނަންޓެއްގެ މަގާމަށް ޑިމޯޓްކޮށް "ޑިސްއޮނަރަބަލް ޑިސްޗާޖް" އެއްގައި ސިފައިންގެ ވަޒީފާއިން ވަކިކޮށްފައިވާ ބޭފުޅެއް ކަމަށް އެމްއެންޑީއެފުން ބުނެއެވެ.
ރައީސް ޔާމީންގެ ވެރިކަމުގައި ރިޔާސީ ލޯންޗުކޮޅު "ފިނިފެންމާ"ގައި އެއްޗެއް ގޮއްވާލި މައްސަލާގައި ފަޔާޒު ހައްޔަރު ކުރީ ބަޑި ގުދަނުގެ އިސްވެރިއަކަށް ހުންނަވަނި ކޮށެވެ. އެ މައްސަލާގައި އޭނާގެ މައްޗަށް ދެ ކުށެއް ސާބިތުވިއެވެ.
އަދުލު އިންސާފު ގާއިމުކުރުމަށް ހުރަސް އެޅުމުގެ ދައުވާ ސާބިތުވިިއިރު އެ މައްސަލާގައި އޭނާއަށް އިއްވީ ދެ އަހަރު ދުވަހުގެ ޖަލު ހުކުމެވެ. އަދި "ފިނިފެންމާ" ގައި ރައީސް އަވަހާރަކޮށްލަން ބޮމެއް ގޮައްވާލި މައްސަލާގައި ގާނޫނީ ޒިންމާ އަދާކުރަން ހުރި މުވައްޒަފަަކަށް ގަސްދުގައި ހުރަސް އެޅުމުގެ ކުށް ސާބިތުވެ އޭނާގެ މައްޗަށް ތިން މަހާއި 18 ދުވަހުގެ ޖަލު ހުކުމެއް ވެސް ވަނީ އިއްވާފައެވެ.
ނަމަވެސް ދެ ހުކުމް ތަންފީޒުކޮށް ނިމުނު ފަހުން ހައިކޯޓުން ވަނީ ދަށު ކޯޓްގެ ދެ ހުކުމްވެސް ބާތިލުކޮށްފައެވެ.
ތިކަހަލަ ގައްދާރުންނައް ހަރުކަށި އަދަބުދޭންޖެހޭ