މަހަށް ގޮސް އުޅުނު މީހެއްގެ ހާލު ދެރަވެ، ވިލިނގިލީ ހޮސްޕިޓަލަށް ގެންގޮސްފިއެވެ.
މިކަމާ ގުޅިގެން އެމްއެންޑީއެފުން ބުނީ، މި ހާދިސާ ހިނގާފައި ވަނީ ގއ. ވިލިނގިލީގެ އިރުން 23 ނޯޓިކަލް މޭލު ބޭރުން 16 މީހުންނާއެކު މަސްވެރިކަން ކުރަން އުޅެނިކޮށް ކަމަށެވެ. އެގޮތުން "މަސްގެލަރީ" ދޯނީގެ ބިދޭސީ ފަޅުވެރިއަކަށް ކުއްލި ސިއްހީ މައްސަލައެއް ދިމާވެގެން، އެމްއެންޑީއެފް ސަދާން އޭރިއާ ކޯސްޓް ގާޑް ސްކޮޑްރަންގެ އެހީތެރިކަން ފޯރުކޮށް ދީފައި ވާ ކަމަށް އެމްއެންޑީއެފުން ބުނެއެވެ.
އެމްއެންޑީއެފްގެ އެހީތެރިކާއެކު، ފަޅުވެރިޔާ ގއ. ވިލިނގިލީ ހޮސްޕިޓަލަށް ގެންގޮސްފައިވަނީ ރޭ ދަންވަރު 3:20 ހާއިރެވެ. އަދި ހާދިސާގެ ރިޕޯޓް ލިބުނީ ރޭ 0:40 ހާއިރު ކަމަށް އެމްއެންޑީއެފުން ބުނެއެވެ.
ކުއްލި ސިއްހީ މައްސަލައެއް ދިމާވެގެން ހޮސްޕިޓަލަށް ގެންގޮސްދިން ފާޅުވެރިޔާގެ ހާލަތާ ބެހޭ ގޮތުން އެމްއެންޑީއެފުން ބުނީ، ރިޕޯޓް ލިބުނީ ފާޅުވެރިޔާ ހޮޑުލާ، އޭނާ ކަރުން ލޭ އަންނަ ކަމަށް ބުނެ ކަމަށެވެ.
މަސްވެރިކަމަށް ނިކުމެ އުޅޭ މަސްވެރިންނަށާއި، ދޯނިތަކުގެ ފަޅުވެރިންނަށް ދިމާވާ މިފަދަ ހާދިސާތަކުގައި އެމްއެންޑީއެފްގެ އެހީތެރިކަން މެދުކެނޑުމެއް ނެތި ލިބެމުން ދާ ކަން ފާހަގަ ކޮށެލެވެއެވެ. އެގޮތުން އެންމެ ގިނައިން ފެންމަތިވަނީ، މަސްވެރިކަން ކުރަން އުޅުމުގެ ތެރޭގައި ލޮލަށް ބުޅި ހެރި އަނިޔާވާ ހާދިސާތަކެވެ.
