މާލޭގައި މިއަދު ފުލުހުން، ސިފައިންނާ ގުޅިގެން ހިންގި ބޮޑު އޮޕަރޭޝަނުން ފެނުނީ ކުޅޭކުޅޭ ބަޑިއެއް ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނީ އެ އޮޕަރޭޝަންގައި ސިފައިން ހަރަކާތްތެރިވަނީ ފުލުހުން އެދިގެން ކަމަށާއި މިހާރު އޮޕަރޭޝަން ނިންމާލާފައިވާ ކަމަށެވެ.
އެ އޮޕަރޭޝަނަކީ މުއިވެޔޮ މަގު ސަރައްހަދުގައި ހުރި ގެ އެއްގައި އަސްލު ބަޑިއެއް ގެންގުޅޭ ކަމަށް ކުރި ރިޕޯޓަކާއި ގުޅިގެން ކުރިއަށް ގެންދިޔަ އޮޕަރޭޝަނެކެވެ.
ނަމަވެސް އެމްއެންޑީއެފްއިން ބެލިއިރު ފެނުނީ "ޓޯއީ ގަންއެއް" ކަމަށް އެމްއެންޑީއެފުން މައުލޫމާތު ދެއެވެ.
މިކަމާ ބެހޭ ގޮތުން ފުލުހުން ބުނެފައިވަނީ ހަތިޔާރު ގެންގުޅޭ ކަމަށް ފުލުހުންނަށް ލިބުނު މައުލޫމާތަކާ ގުޅިގެން މިއަދު ހިންގި އޮޕަރޭޝަނެއްގައި ގެއެއް ބަލައި ފާސްކޮށްފައިވާ ކަމަށެވެ. އަދި މި އޮޕަރޭޝަންގައި ބަލައި ފާސްކުރި ގެއިން އެފަދަ އެއްވެސް އެއްޗެއް ފެނިފައެއް ނުވާ ކަމަށާއި މި އޮޕަރޭޝަން މިހާރު ނިންމާލާފައިވާ ކަމަށް ވެސް ފުލުހުން ވަނީ ބުނެފައެވެ.
