އިންޑިއާގެ އެގްޒިމް ބޭންކުގެ ލޯނު އެހީގައި އައްޑޫ ސިޓީ ގަން އިންޓަނޭޝަނަލް އެއާޕޯޓު ތަރައްގީ ކުރުމަށް ކުރިއަށް ގެންދާ މަޝްރޫއުގެ ކޮންސަލްޓެންސީ މަސައްކަތް ފަށައިފިއެވެ.
އިކޮނޮމިކް މިނިސްޓްރީން ބުނީ މިއަދު ފެށި އެ މަޝްރޫއުގެ ކޮންސަލްޓެންޓެއްގެ ގޮތުގައި ހަރަކާތްތެރި ވަނީ އެއާޕޯޓްސް އޮތޯރިޓީ އޮފް އިންޑިޔާގެ ޓީމެއް ކަމަށާއި އެ ޓީމުން މިއަދު ވަނީ ގަން އިންޓަރނޭޝަނަލް އެއާޕޯޓަށް ޒިޔާރަތް ކޮށްފައި ކަމަށެވެ.
އެ މަޝްރޫއުގެ ދަށުން ގަން އިންޓަނޭޝަނަލް އެއާޕޯޓުގައި އާ ޑޮމެސްޓިކް ޓާމިނަލަކާއި، ކޮންޓްރޯލް ޓަވަރަލާއި ފަޔާ ސްޓޭޝަން އިމާރާތް ކުރާނެއެވެ. އަދި މިހާރު ހުރި ޓާމިނަލް، އިންޓާނޭޝަނަލް ޓާމިނަލްގެ ގޮތުގައި ތަރައްގީ ކޮށް، ޑިއުޓީ ފްރީ ފިހާރަތަކާއި ރެސްޓޯރަންޓްތަކާއި ލައުންޖު ވަސީލަތްތައް ގާއިމު ކުރާނެއެވެ.
މީގެ އިތުރުން އެއާޕޯޓަށް ދިޔުމަށް އިތުރު މަގެއް ގާއިމު ކޮށް ކާގޯ ވަސީލަތްތައް ތަރައްގީ ކުރާނެއެވެ.
އިކޮނޮމިކް މިނިސްޓްރީން ބުނީ ގަން އިންޓަނޭޝަނަލް އެއާޕޯޓަކީ ރާއްޖޭގެ ދެކުނުގެ މައި ދޮރާށި ކަމަށާއި އެ އެއާޕޯޓު ޒަމާނީ ވަސީލަތްތަކާއެކު ތަރައްގީ ކޮށް ފެންވަރު ރަނގަޅު ކުރުމަކީ ދެކުނުގެ އިގްތިސޯދަށް މުހިއްމު ކަމެއް ކަމަށެވެ.
އެގޮތުން އެ ސަރަހައްދުގައި ފަތުރުވެރިކަމާއި މަސްވެރިކަމާއި އެހެނިހެން ސިނާއަތްތައް ތަރައްގީކޮށް، ދެކުނުގެ އަތޮޅުތަކުގެ އިގްތިސޯދު ފުޅާކުރުމަށް ކޮންމެހެން ބޭނުންތެރި ކަމެއް ކަމަށާއި ގަން އެއާޕޯޓު ތަރައްގީ ކުރުމުގެ މަސައްކަތް މި އަހަރު ފަހުކޮޅު ފަށާނެ ކަމަށްވެސް މިނިސްޓްރީ އިން ބުނެއެވެ.
