2022 ވަނަ އަހަރު ރާއްޖޭގެ ފަތުރުވެރި ކަމަށް 50 އަހަރު ފުރުން ފާހަގަ ކުރުމަށް ކުރިއަށް އޮތީ 272 ދުވަސް ކަމަށް ޓޫރިޒަމް މިނިސްޓްރީން ބުނެފިއެވެ.
ކައުންޓްޑައުންގެ މެސެޖަކާއެކު އެ މިނިސްޓްރީން ޓްވިޓާގައި ޝާއިއު ކުރި ވިޑިއޯއެއްގައި ފެނިގެން ދަނީ މަޝްހޫރު މޮޓޯސައިކަލް ރޭސާ ޖޯޖް ލޮރެންޒޯގެ މަރުހަބާގެ މެސެޖެކެވެ. އެ މެސެޖުގައި 2022 ވަނަ އަހަަރަކީ ރާއްޖޭގެ ފަތުރުވެރި ކަމަށް ފާގަތި އަހަރަކަށް ވާނެ ކަމަށް އުންމީދު ކުރާ ކަމަށް ލޮރެންޒޯ ބުނެއެވެ.
ޖަޒީރާ މި ރީތި ރާއްޖެއަށް އޭނާ އައިސް ހޭދަ ކުރި ދުވަސްތަކަކީ ވަރަށް ހިތްހަމަ ޖެހޭ ދުވަސްތަކެއް ކަމަށް ލޮރެންޒޯ ބުނެއެވެ. އަދި 2022 އަށް މަރުހަބާ ކިޔަމުން ލޮރެންޒޯ ވަނީ އަދިވެސް އެނާ ރާއްޖެއަށް ޒިޔާރަތް ކުރާނެ ފަދަ މޭރުމަކުން "އަދި ވަރަށް އަވަހަށް ފެންނާނެ" ކަމަށް ބުނެފައެވެ.
2020 ވަނަ އަހަރު ނިމުނު އިރު 5 ލައްކަ އަށް ވުރެ ގިނަ ފަތުރުވެރިން ރާއްޖެއަށް ޒިޔާރަތް ކޮށްފައިވާ އިރު އެއީ އެ އަހަރު ފަތުރުވެރިން ރާއްޖެއަށް އަންނާނެ ކަމަށް ލަފާ ކުރި ޓާގެޓަށް ވުރެ އިތުރު އަދަދެކެވެ. އަދި މި އަހަރު މާޗް މަސް ނިންމާލި އިރު ރާއްޖެއަށް ޒިޔާރްތް ކުރި ފަތުރުވެރިންގެ އަދަދު ވަނީ އެއް ލައްކައަށް އަރާފައެވެ.
ރާއްޖޭގެ ފަތުރުވެރި ކަމަށް 50 އަހަރު ފުރުން ކުރިއަށްދާ އިރު މިއަހަރު ރާއްޖެ ޕްރޮމޯޓު ކުރުމަށް ގިނަ ކެމްޕޭން ތަކެއް ކުރާނެ ކަމަށް ޓޫރިޒަމް މިނިސްޓްރީން ވަނީ ބުނެފައެވެ. އެ ގޮތުން "ފަތުރުވެރިކަމުގެ ރަން އަހަރު 2022" ކައުންޓްޑައުން ވަނީ ފަށާފައެވެ. އެ ކައުންޓްޑައުން މި އަހަރު ޖެނުއަރީ 1 ވަނަ ދުވަހުން ފެށިގެން ޑިސެމްބަރު 31ގެ ނިޔަލަށް ތަފާތު އެކި ފަރާތްތަކަމުގެ ވީޑިއޯ މެސެޖުތަކާއެކު އާންމު ކުރަމުން ދާނެ ކަމަށް އެ މިނިސްޓްރީން ވަނީ ބުނެފައެވެ.
މި ކައުންޓްޑައުންގައި ފަތުރުވެރިކަމުގެ ސިނާއަތް ރާއްޖެއަށް ތައާރަފު ކުރުމުގައި އިސްކޮށް އުޅުނު ފަރާތްތަކާއި، ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއި، މީގެ އިތުރުން ފާހަގަ ކޮށްލެވޭ ފަރާތްތަކެއްގެ ވީޑިއޯ މެސެޖްތައް ގެނެސްދޭނެ ކަމަށް އެ މިނިސްޓްރީން ވަނީ ބުނެފައެވެ.
ރާއްޖޭގައި ފަތުރުވެރިކަން ފެށިފައި ވަނީ 1972 ވަނަ އަހަރުގެ ތެރޭގައެވެ. އޭރު ރާއްޖޭގައި އޮތީ ދެ ރިސޯޓެވެ. އެއީ މިހާރުވެސް ފަތުރުވެރިކަމުގެ ސިނާއަތުގައި އޮތް ދެ ރިސޯޓު ކަމަށްވާ ކުރުނބާ މޯލްޑިވްސް އާއި ބަނޑޮސް އައިލެންޑް ރިސޯޓެވެ.
