ކައުންސިލްތަކުން ލޯކަލް އޮތޯރިޓީ ކުންފުނި އުފައްދާ ވިޔަފާރި ކުރަން ކައުންސިލްތަކަށް ހުއްދަ ދީފިއެވެ.
އިކޮނޮމިކް މިނިސްޓްރީން މިއަދު ވަނީ "ކައުންސިލްތަކުން ލޯކަލް އޮތޯރިޓީ ކުންފުނި އުފެއްދުމާއި އަމިއްލަ ފަރާތްތަކާއެކު ވިޔަފާރިކުރުމާ ބެހޭ ގަވައިދު" ގެޒެޓުކޮށްފައެވެ.
އުސޫލުގައި ބުނިގޮތުގައި ލޯކަލް އޮތޯރިޓީ ކުންފުނި އުފައްދަން ރަށު ކައުންސިލް، އަތޮޅު ކައުންސިލް ނުވަތަ ސިޓީ ކައުންސިލްގެ ފަރާތުން ހުށަހެޅޭނީ އެ ކައުންސިލެއްގެ މެންބަރުންގެ އަގުލަބިއްޔަތުން ފާސްކޮށްފައިވާ ގަރާރަކުންނެވެ.
ކުންފުނީގެ ހަމައެކަނި ހިއްސާދާރަކީ ރަށު ކައުންސިލް ނަމަ އެ ކުންފުނީގެ ނަމަކީ އަތޮޅާއި ރަށުގެ ނަމެވެ. ކުންފުނީގެ ހަމައެކަނި ހިއްސާދާރަކީ އަތޮޅު ކައުންސިލް ނަމަ އެ ކައުންސިލެއް ނިސްބަތްވާ އިދާރީ ދާއިރާގެ ނަން އަދި ކުންފުނީގެ ހަމައެކަނި ހިއްސާދާރަކީ ސިޓީ ކައުންސިލެއް ނަމަ އެ ކައުންސިލެއް ނިސްބަތްވާ ސިޓީގެ ނަމެވެ.
އެ ގަވާއިދުގެ ދަށުން އުފައްދާ ކުންފުންޏެއްގެ ހިއްސާ ބަދަލުކުރެވޭނީ، ހަމައެކަނި ކައުންސިލުތަކުގެ މެދުގައެވެ. ހިއްސާ ބަދަލުކުރުމަށް އެދި ހުށަހަޅާއިރު، ލޯކަލްއޮތޯރިޓީ ކުންފުނީގައި ހިއްސާވުމަށް އެދި ސިޓީ ކައުންސިލުގެ ފަރާތުން، ނުވަތައަތޮޅު ކައުންސިލުގެ ފަރާތުން، ނުވަތަ ރަށު ކައުންސިލުގެ ފަރާތުން، އެ ކައުންސިލުގެ މެންބަރުންގެ އަގްލަބިއްޔަތުން ފާސްކޮށްފައިވާ ގަރާރު ހުށަހަޅާންވާނެއެވެ.
އެ ގަވާއިދުގެ ދަށުން ރަޖިސްޓަރީ ކުރުމަށް ހުށަހަޅާ ކޮންމެ ކުންފުންޏެއްގައި މަދުވެގެން ތިން ޑިރެކްޓަރުން ތިބެން ޖެހެއެވެ. ކޮންމެ ކުންފުންޏެއްގެ ހިންގާ ގަވާއިދުގައި އެ ކުންފުންޏެއްގެ ޑިރެކްޓަރުންގެ އަދަދު ލިޔެ ބަޔާންކުރުމަށް ގަވާއިދުގައި ބުނެއެވެ
ރަޖިސްޓަރީ ކުރުމަށް ހުށަހަޅާ ކުންފުންޏެއްގެ ހަމައެކަނި ހިއްސާދާރަކީ ވަކި ކައުންސިލެއް ނަމަ، އެ ކުންފުންޏެއްގެ ޑިރެކްޓަރުންގެ ގޮތުގައި ތިބެވޭނީ، އެ ކައުންސިލެއްގެ މެންބަރުންގެ ގަރާރަކުން އައްޔަނު ކުރާފަރާތްތެއް ކަމަށް ގަވާއިދުގައި ބުނެއެވެ. ގަވައިދުގައި ބުނާގޮތުން އއައްޔަނުކުރާ ޑިރެކްޓަރަކު ވަކިކުރެވޭނީ، ކައުންސިލުގެ މެންބަރުންގެ ގަރާރަކުން ނިންމާ ނިންމުމަކުންނެވެ.
އޭގެ އިތުރުން ކައުންސިލުތަކުން އަމިއްލަ ނަމުގައި ކުރާ ވިޔަފާރީގެ ގޮތުގައި ކައުންސިލުން ކަނޑައަޅާ ވިޔަފާރި ހަރަކާތްތައް ހިންގާންވާނީ، އެ ގަވާއިދަށް ޢަމަލުކުރަން ފަށާތާ 9 މަސް ދުވަހުގެ ތެރޭގައި، އެ ގަވާއިދުގެ ދަށުން ލޯކަލް އޮތޯރިޓީ ކުންފުންޏެއް ރަޖިސްޓަރީކޮށް، އެ ކުންފުނީގެ ދަށުންކަމަށް އެ ގަވާއިދުގައި ބުނެފައިވެއެވެ.
