ތިން މީހަކާއެކު ދަތުރުކުރަމުން ދިޔަ ލޭންްޑިން ކްރާފްޓެއް ބަންޑުންޖަހާލައިގެން އެމްއެންޑީއެފްގެ ކޯސްޓްގާޑް ސްކޮޑްރަން ހަރަކާތްތެރިވާން ފަށައިފިއެވެ.
އެމްއެންޑީއެފުން ބުނީ މާލެއިން ތ. ގުރައިދޫ ދަތުރުކުރަމުން ލޭންޑިންގް ކްރާފްޓެއް ބަންޑުން ޖަހާލައިގެން އުޅޭ ކަމުގެ ރިޕޯޓް ލިބިފައިވަނީ މެންދުރު 1:13 ހާއިރު ކަމަށެވެ.
އެ ލޭންޑިން ކްރާފްޓްގައި ތިން މީހުން ތިބި ކަމަށް އެމްއެންޑީއެފުން މައުލޫމާތުދެއެވެ. އަދި އެމީހުން އެސަރަހައްދުން ދަތުރުކުރި ދޯންޏަކަށް ނަގައިގެން ތ. ދިޔަމިނގިލި ހެލްތް ސެންޓަރަށް ގެންގޮސްފައިވާކަމަށް ވެސް އެމްއެންޑިއެފުން މައުލޫމާތުދެއެވެ.
ރާއްޖެއަށް ކުރަމުން ދާ ވިއްސާރައާއެކު ކަނޑުމަތީގެ ތަފާތު ހާދިސާތައް މިހަފްތާ ތެރޭގައި ވަނީ ވަނީ ހިނގާފައެވެ.
އެގޮތުން ގއ.އަތޮޅު ޕާކް ހަޔަޓް މޯލްޑިވްސް ހަނޑަހާ ރިސޯޓް ބޭރު ޖެޓީ ފައްތިޔަލުގައި އަޅާފައި އޮތް ލޯންޗެއް ވަނީ ބަންޑުން ޖަހާލާފައެވެ.
މީގެ އިތުރުން 3 މީހުންނާއެކު ދަތުރުކުރި ތެޔޮ އުފުލާ ދޯންޏެއް މިދިޔަ އަންގާރަ ދުވަހު ވަނީ އަޑިއަށް ގޮސްފައެވެ. އޭގެ އިތުރުން އަޅާފައި އޮތް ބާޖެއް، ނަގިލި ކަނޑައިގެން ގޮސް ފަރަކަށް އެރި ހާދިސާއެއް ވެސް ވަނީ ހިނގާފައެވެ.
މޫސުން ގޯސްވުމާ ގުޅިގެން މުސުމަށް ސަމާލުކަމެއް ދިނުމަށް މެޓް އޮފީހުން އަދި އެމްއެންޑީއެފުން ވެސް ވަނީ އިލްތިމާސް ކޮށްފައެވެ. ހާއްސަކޮށް ކަނޑުދަތުރު ކުރާ ފަރާތްތަކުން މޫސުމަށް ސަމާލުކަން ދިނުމަށް ވަނީ އެދިފައެވެ.
