ދައުލަތުގެ ބެލުމުގެދަށުގައި ތިބޭ ކުޑަކުދިން ބަލަހައްޓަން ވިލިމާލޭގައި ހަދާފައި ހުންނަ ކުޑަކުދިންގެ ހިޔާގައި ބޮޑު ހަމަނުޖެހުމެއް ހިންގައިފިއެވެ.
ޖެންޑާ މިނިސްޓްރީގެ މީޑިއާއިން ބުނީ ރޭ އެ ތަނުގައި ހަމަނުޖެހުމެއް ހިންގާފައިވާ ކަމަށާއި ނަމަވެސް މިހާރު ތަނުގެ ހާލަތު އާންމު ހާލަތަށް ބަދަލުވެފައިވާ ކަމަށެވެ.
މައުލޫމާތު ލިބިފައިވާ ގޮތުގައި އެތަނުގައި ހިނގި ހަމަ ނުޖެހުމުގެ ތެރޭގައި 10 ކުއްޖަކު އެތަނުން ނުކުމެގެން ބޭރަށް ވެސް ދިޔައެވެ. ނަމަވެސް އެކުދިން އަމިއްލައަށް އެނބުރި އައި ކަމަށް "ދަ ޕްރެސް" އަށް މައުލޫމާތު ދެއްވި ސަރުކާރުގެ އޮފިޝަލަކު ވަނީ ވިދާޅުވެފައެވެ.
އަދި ރޭގެ އެ ހަމަނުޖެހުމުގައި އެތާނގައި ހުރި ބައެއް ފަރުނީޗަރަށް ގެއްލުން ދީފައި ވާ ކަމަށާއި އޭގެ ތެރެއިން 1 ކުއްޖަކު ފުލުހުންގެ ބެލުމުގެ ދަށަށް ގެންގޮސްފައި ވާ ކަމަށެވެ.
އުމުރުން 13-18 އަހަރާ ދެމެދުގެ ކުދިން ބައިތިއްބާ އެ ހިޔާގައި 29 ކުއްޖަކު ތިބެއެވެ.
