ދެ މެޖިސްޓްރޭޓަކު މަސައްކަތް ކުރާ ކޯޓު ބަދަލުކުރުމަށް ޖުޑީޝަލް ސާވީސް ކޮމިޝަން (ޖޭއެސްސީ) އިން ނިންމައިފިއެވެ.
ޖޭއެސްސީން ބުނީ ދާއިމީ ފަނޑިޔާރުން އައްޔަނުކުރެވިފައި ނުވާ ކޯޓުތަކަށް ފަނޑިޔާރުން ހަމަޖެއްސުމަށްޓަކައި، ރަށްރަށުގެ އާބާދީ އަށާއި މައްސަލައިގެ ނިސްބަތަށް ބަލައި، މަދު މައްސަލަ ހުށަހެޅޭ މެޖިސްޓްރޭޓް ކޯޓުތަކުގައި ތިއްބެވި މެޖިސްޓްރޭޓުންނަށް، އެޖުޑީޝަލް ދާއިރާގެ ތެރޭގައި ހިމެނޭ، މެޖިސްޓްރޭޓަކު ނެތް ކޯޓުތަކުގެ ތެރެއިން، ގިނައިން މައްސަލަ ހުށަހެޅޭ އަދި އާބާދީބޮޑުރަށްރަށުގެ މެޖިސްޓްރޭޓް ކޯޓުތަކަށް ބަދަލުވުމުގެ ފުރުސަތު ތު އޮންނަ ކަމަށެވެ.
ބަދަލުވުމަށް އެދުނު މެޖިސްޓްރޭޓުން، މަސައްކަތް ކުރަމުންދިޔަ ކޯޓު ނޫން އެހެންކޯޓަކަށް ބަދަލުކުރުމަށް ކޮމިޝަނުން ނިންމާފައިވާ ކަމަށް ޖޭއެސްސީން ބުނެއެވެ.
އެގޮތުން ކޯޓު ބަދަލު ކުރުމަށް ނިންމާފައި ވަނީ މިދިޔަ އަހަރުގެ މާރިޗް 14 އިންފެށިގެން ކ.ހުރާ މެޖިސްޓްރޭޓް ކޯޓުގެ އިސް މެޖިސްޓްރޭޓް އިބްރާހީމް ޝަކީބު ކ.ހިންމަފުށީ މެޖިސްޓްރޭޓް ކޯޓުގެ އިސް މެޖިސްޓްރޭޓްގެ މަގާމަށެވެ.
އަދި މިދިޔަ އަހަރު އޭޕްރީލް 11 އިންފެށިގެން ފ.މަގޫދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް އަބްދުއްސައްތާރު ސުލައިމާނު ފ.ބިލެތްދޫ މެޖިސްޓްރޭޓް ކޯޓުގެ އިސްމެޖިސްޓްރޭޓް ކަމުގެ މަގާމަށެވެ.
