ފުލުހުންގެ ހިދުމަތުގެ އާ ގާނޫނަށް އަމަލުކުރުމުގެ ގޮތުން ފުލުހުންގެ ރޭންކު ތަކާއި ގްރޭޑު ތަކަށް މުވައްޒަފުން ކަނޑައެޅުމަށް ކުރަން ޖެހޭ އިދާރީ މަސައްކަތްތައް ކުރަމުން ދާ ކަމަށް ފުލުހުން ބުނެފިއެވެ.
ފުލުހުން ބުނީ، ފުލުހުންގެ ހިދުމަތުގެ އާ ގާނޫނަށް މާދަމާއިން ފެށިގެން އަމަލު ކުރަން ފެށުމަށް ހަމަޖެހިފައި ވާ އިރު އެ ގާނޫނާ ގުޅިގެން ގެންނަން ޖެހޭ ބަދަލުތައް ގެނައުމަށް އިދާރީ މަސައްކަތްތައް މިހާރު ކުރަމުން ދާ ކަމަށެވެ. ފުލުހުންގެ ހިދުމަތުގެ އާ ގާނޫނު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ތަސްދީގު ކުރެއްވީ މިދިޔަ އަހަރުގެ ޑިސެމްބަރު 27 ގައެވެ.
މިހާރު ކުރަމުންދާ އިދާރީ މަސައްކަތްތަކުގެ ތެރެއިން އެ ގާނޫނުގައި ބަޔާން ކުރާ ރޭންކު ތަކަށް މުވައްޒަފުން ކަނޑައެޅުން ހިމެނޭ ކަމަށް ފުލުހުން ބުނެއެވެ. މިހާރު ބޭނުން ކުރަނީ 15 ރޭންކު ކަމަށާއި އާ ގާނޫނުގައި ކަނޑައަޅާ ފައި ވަނީ 11 ރޭންކު ކަމަށް ފުލުހުން ބުނެއެވެ. އެ ބަދަލާ އެކު ސްޕްރިންޓެންޑެންޓް އޮފް ޕޮލިހުން ފެށިގެން ދަށުގެ ރޭންކު ތަކަށް ގްރޭޑް ކަނޑައެޅުމަށް ވެސް ގާނޫނު ލާޒިމުމުރާ ކަމަށް ފުލުހުން ބުނެއެވެ.
މިހާރު ކުރަމުންދާ މަސައްކަތަކީ ރޭންކު ތަކާއި ގްރޭޑު ތަކަށް މުވައްޒަފުން ކަނޑައެޅުމުގެ މަސައްކަތް ކަމަށް ފުލުހުން ބުނެއެވެ. މީގެ އިތުރުން ގާނޫނު ނަންބަރު 34/2020 އާ ގުޅިގެން އަންނަ އިތުރު ބަދަލުތަކުގެ މައުލޫމާތު ހިއްސާ ކުރާނެ ކަމަށް ވެސް ފުލުހުން ބުނެއެވެ.
