ފުލުހުންގެ އޮޕަރޭޝަންތަކުގައި ގެންގުޅޭ ކުއްތާއެއް ކަމަށްވާ 'ޝަކީރާ' މިއަދު މަރުވެއްޖެއެވެ.
ފުލުހުން ބުނީ ޝަކީރާ މަރުވީ ބަލިވެ އުޅުމަށްފަހު ކަމަށެވެ. ޝަކީރާއަކީ ގޯލްޑެން ރިޓްރީވާ އެކެވެ.
ޑްރަގް އޮޕަރޭޝަންތަކުގައި ބޭނުންކުރާ އިތުރު ކުއްތާއެއް ވެސް މީގެ ކުރިން މަރުވެފައި ވާއިރު، އެ ސްކޮޑުގައި މިހާރު އޮތީ 15 ކުއްތާއެވެ.
ފުލުހުންގެ ގެންގުޅޭ ކުއްތާތަކުގެ ތެރޭގައި ތަފާތު ވައްތަރުތަކުގެ ކުއްތާތައް ހިމެނެއެވެ. އެގޮތުން، ބެލްޖިއަމް މަލިނޮއިސް، ލެބްރެޑާ، ގޯލްޑެން ރިޓްރީވާ، ޗޮކްލެޓް ލެބްރޯޑް، ޕެޓިޑޭލް، ޖެކް ރަސްލް ހިމެނެއެވެ. މީގެ ތެރެއިން ފުލުހުން ދައްކާލާފައި ވަނީ، ބެލްޖިއަމް މަލިނޮއިސް، ދެ ލެބްރޭޑާ އަދި ލެބްރޭޑާ ޕެޓިޑޭލް މިކްސް އެކެވެ. އެއީ ބްލެކީ، ސޭމް އަދި ޓާރާއެވެ.
މަސްތުވާތަކެއްޗާ ދެކޮޅަށް ފުލުހުންގެ އޮޕަރޭޝަން ވަރުގަދަކުރަން ޑޯގް ސްކޮޑެއް އުފައްދައި ކުއްތާތައް ގެނައުމުގައި އިސް ދައުރެއް އަދާކުރެއްވީ ކުރީގެ ރައީސް އަބްދުﷲ ޔާމީންގެ ވެރިކަމުގައި އޭރުގެ ހޯމް މިނިސްޓަރު އުމަރު ނަސީރެވެ.
