މާލެ އުތުރު ފަރާތު، ކުރީގެ ވެސްޓް ޕާކް ހުރި ސަރަހައްދުގައި މަސްބޭނުމަށް ހަދާފައި ހުންނަތަން ތަރައްގީ ކުރުމަށް މާލޭ ސިޓީ ކައުންސިލުން ނިންމައިފިއެވެ.
ސިޓީ ކައުންސިލުން ވަނީ އެ ތަން ތަރައްގީ ކުރުމަށް ކުރަހާފައިވާ ޑިޒައިންތަކެއްގެ ފޮޓޯ އާންމުކޮށްފައެވެ.
އެތަން ތަރައްގީ ކުރުމަށް ނިންމާފައި ވާއިރު، މިދިޔަ އަހަރު މަސްބާނަންދާ ފިޝިންގް ޕޮއިންޓްގެ ޝީޓް ވެއްޓި ވަނީ ދެމީހަކަށް އަނިޔާވެސް ވެފައެވެ. ވެސްޓް ޕާކް ސަރަހައްދުގައި ހުންނަ ފިޝިންގް ޕޮއިންޓުގައި އޮތް ޝީޓް ވެއްޓިފައި ވަނީ ގިނަ ދުވަސްވެ ފީވެގެންނެވެ.
ރަސްފަންނުގެ ނިމޭ ސަރަހައްދުގައި ހުންނަ އެ ފިޝިންގް ޕޮއިންޓު ހުންނަތާ 15 އަހަރަށް ވުރެ ގިނަ ދުވަސްވަނީ ވެފައެވެ.
މާލެ އުތުރު ފަރާތް ތަރައްގީ ކުރުމަށް ކުރަމުން ދާ މަސައްކަތުގެ ތެރެއިން މިދިޔަ އަހަރު ވަނީ މާލެ ވަށައިގެން ބޮޑުތަކުރުފާނު މަގުން ހިނގޭނެހެން ހަދާފައެވެ. އަދި އެއާއެކު ކުރީގެ ވެސްޓް ޕާކް ހުރި ސަރަހައްދުގައި އައުޓްޑޯ ޖިމަކާއި ބަސް ސްޓޮޕެއް ވަނީ ހުޅުވާފައެވެ.
