އާމްދަނީން ޓެކްސް ނެގުމުގެ ގާނޫނަށް އިސްލާހު ގެނައުގެ ބިލަކާއި ފޮރިން ސާވިސްގެ ބިލެއް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅުމަށްޓަކައި ރައީސް އޮފީހަށް ފޮނުވައިފިއެވެ.
އެޓާނީ ޖެނެރަލް އޮފީސް (އޭޖީ) އިން ބުނީ މިއަދު އެ ދެބިލު ރައީސް އޮފީހަށް ފޮނުވާފައިވާ ކަމަށެވެ.
ސަރުކާރުގެ ފަރާތުން ދެ ބިލެއް ހުށަހަޅަން ފޮނުވާފައި ވާއިރު އެ ބިލުތަކުގެ ތެރެއިން ދިވެހިރާއްޖޭގެ ފޮރިން ސާވިސްގެ ބިލު ހުށަހަޅަނީ، ދިވެހިރާއްޖޭގެ ހާރިޖީ ސިޔާސަތު ހަރުދަނާކޮށް، ބައިނަލްއަގްވާމީ ގޮތުން ފެންވަރު ރަނގަޅު މިންގަނޑަކަށް ފެއްތުމަށްޓަކައި ބޭނުންވާ ހާއްސަ ތަމްރީނާއި ހުނަރާއި ތަޖުރިބާ ލިބިފައިވާ ޕްރޮފެޝަނަލް ފޮރިން ސާވިސް ކޭޑަރެއް ބިނާ ކުރުމަށް ކަމަށް އޭޖީން ބުނެއެވެ. ފޮރިން ސާވިސްގެ ނަމުގައި ވަކި ހިދުމަތެއް ގާއިމުކޮށް، އެ ހިދުމަތް ރޭވިފައިވާ ގޮތާއި، އެ ސާވިސް ހިންގުމާ ގުޅޭ އުސޫލުތަކާއި، އެ ސާވިސްގެ މުވައްޒަފުންނާ ގުޅޭ އެންމެހައި އުސޫލުތައް ކަނޑައެޅުމަށް ބޭނުންވާ ގާނޫނީ އޮނިގަނޑު ގާއިމު ކުރުމަށް ކަމަށް އޭޖީން ބުނެއެވެ.
މީގެ އިތުރުން އާމްދަނީން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބިލެއް ހުށަހަޅަނީ، އެ ގާނޫނުގެ ދަށުން ޓެކްސް ނެގޭ އުޖޫރައިގެ ތެރެއިން އިސްތިސްނާވާ ބާވަތްތައް އިސްލާހު ކުރުމަށް ކަމަށް އޭޖީން ބުނެއެވެ. ހަމައެއާއެކު ދިވެހިރާއްޖޭގައި ވަޒަންވެރިވެފައި ނުވާ ފަރާތްތަކުން ދައްކަން ޖެހޭ ބޭންކް ކޮމިޝަނާއި، އިންޓަކަނެކްޝަން ޗާޖަސް އަދި ރީއިންޝުއަރަންސް ޕްރީމިއަމް އިން ޓެކްސް ދެއްކުމުން އިސްތިސްނާ ކުރުމަށް ކަމަށް ވެސް އޭޖީން ބުނެއެވެ.
އަދި ދިވެހިރާއްޖޭގައި ވަޒަންވެރިވެފައި ނުވާ ފަރާތްތަކުން ދައްކަންޖެހޭ ވިތުހޯލްޑިން ޓެކްސް ދެއްކުމުގެ އުސޫލު އިސްލާހު ކުރުމަށާއި، އެ ގާނޫނުގެ ދަށުން ޓެކްސް ނަގަން ފެށި ފަހުން، ގާނޫނު ތަންފީޒު ކުރުމުގައި ކުރިމަތިވަމުން އައިސްފައިވާ ދަތިތައް ހައްލުކޮށް، އާމްދަނީން ޓެކްސް ނެގުމުގެ ނިޒާމު އިތުރަށް ހަރުދަނާ ކުރުމަށްޓަކައި އެ ގާނޫނަށް ގެންނަންޖެހޭ އިސްލާހުތައް ގެނައުމަށް ހުށަހަޅާ އިސްލާހެއް ކަމަށް ވެސް އޭޖީން ބުނެއެވެ.
