ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) ގެ ކޭސްތައް އިތުރުވަމުން ދާތީ، މިއަދުން ފަށައިގެން ހުޅަނގު އައްސޭރީގައި ލޮކްޑައުން ތަންފީޒު ކުރުމަށް ފަލަސްތީނުގެ ސަރުކާރުން އަމުރު ކޮށްފިއެވެ.
ކޭސް އިތުރު ވަމުން ދާތީ، ހުޅަނގު އައްސޭރި ލޮކްޑައުން ކުރަނީ، މިއަދުން ފަށައިގެން 5 ދުވަހުގެ މުއްދަތަށެވެ.
ފަލަސްތީނު ސަރުކާރުގެ ތަރުޖަމާނު އިބްރާހީމް މިލްހިމް ވިދާޅުވީ، ފަލަސްތީނުގެ އެއް ސިޓީއިން އަނެއް ސިޓީއަށް ދަތުރު ކުރުންވެސް މަޑުޖައްސާލާފައި ވާ ކަމަށާ، މި ހުއްދަ އޮންނާނީ ސިއްހީ ހިދުމަތްތެރިންނަށް އެކަނި ކަމަށެވެ.
ނަމަވެސް، މި އުސޫލުތައް ތަންފީޒު ކުރާ ސަރަހައްދުތަކުގެ ތެރޭގައި، ހަމާސް ޖަމާއަތުން ކޮންޓްރޯލް ކުރާ ޣައްޒާ ހިމަނާފައެއް ނުވެއެވެ.
މި ދަނޑިވަޅަކީ ފަލަސްތީނުގައި ކޮވިޑް-19ގެ ނުރައްކާ އިންތިހާއަށް ނުރައްކާ ވެފައިވާ ދަނޑިވަޅެކެވެ. އެގޮތުން، ހޮނިހިރު ދުވަހު 27 މަރުގެ ކޭހަކާ، 1784 ޕޮޒިޓިވް ކޭސް ރެކޮޑް ކޮށްފައި ވާ ކަމަށް މައުލޫމާތު ލިބެއެވެ.
