މަލޭގައި ހިންގާ ކެފޭ ރެސްޓޯރެންޓް، ސައި ހޮޓާތަކަށް ލިބެމުންދާ ގެއްލުންތަކަށް ހައްލެއް ހޯދައި ދިނުމަށް ކުރީގެ ހައުސިން މިނިސްޓަރު އަދި މާލެ ސިޓީ ކައުންސިލްގެ މޭޔަރު ކަމަށް ކުރިމަތިލައްވާފައިވާ ކެންޑިޑޭޓް ޑރ. މުހައްމަދު މުއިއްޒު ގޮވާލައްވައިފިއެވެ.
މުއިއްޒު ރޭ ކުރެއްވި ޓްވީޓެއްގައި ވިދާޅުވީ މަލޭގައި ހިންގާ ކެފޭ ރެސްޓޯރެންޓް، ސައި ހޮޓާތަކަށް ލިބެމުންދަނީ އިއާދަ ނުކުރެވޭ ވަރުގެ ގެއްުންތަކެއް ކަމަށެވެ. އަދި އެއީ ސިޓީ ކައުންސިލުންނާއި ސަރުކާރުން ސީރިއަސް ގޮތެއްގައި ސަމާލުކަން ދޭން ޖެހޭ ކަމެއް ކަމަށް އޭނާ ވިދާޅުވިއެވެ.
އޭނާ އިތުރަށް ވިދާޅުވީ، އެ ވިޔަފާރިތައް ދަނީ ބަނގުރޫޓުވަމުން ކަމަށާއި، އެކަމުގެ ސަބަބުން އެތައް ރައްޔިތުންނެއްގެ ވަޒީފާ ގެއްލެމުން ދާ ކަމަށެވެ.
މުއިއްޒު މިހެން ވިދާޅުވެފައި ވާއިރު ކޮވިޑް-19 ފެތުރޭތީ، ރައްކާތެރިކަމުގެ ފިޔަވަޅެއްގެ ގޮތުން މާލެ ސަރަހައްދުގެ ކެފޭ ރެސްޓޯރެންޓް އަދި ސައި ހޮޓާތަކުން ހިދުމަތް ދިނުމުގެ ހުއްދަ ދީފައި ވަނީ ރޭގަނޑު އަށަކާ ހަމައަށެވެ. އަދި 10:3 ވަންދެން ޓެކްއަވޭ އަދި ޑެލިވަރީގެ ހިދުމަތްތައް ދޭ ގޮތަށް ވަނީ ހަމަޖައްސާފައެވެ.
ރޭގަނޑު އަށެއްގެ ފަހުން ކެފޭ ރެސްޓޯރެންޓްތަކުން ހިދުމަތް ދިނުން މަނާ ކޮށްފައި ވާއިރު، އެއީ އެންމެ ގިނަ ބަޔަކު ރެސްޓޯރެންޓްތަކަށް ދާ ގަދިކަން ފާހަގަ ކޮށްލެވެއެވެ. މިކަމުގެ ސަބަބުން ރެސްޓޯރެންޓްތަކަށް ބޮޑެތި ގެއްލުންތައް ލިބެމުން ދާއިރު، މާގިނަ ދުވަސް ވަންދެން މި ފިޔަވަޅު މިގޮތުގައި ދަމަހައްޓާއިފި ނަމަ ވިޔަފާރިތައް ބަންދު ކުރަން ޖެހިދާނެ ކަމުގެ ކަންބޮޑުވުން ރެސްޓޯރެންޓްތަކުގެ ވެރިން ވަނީ ފާޅުކޮށްފައެވެ.
