ފުލުހުންނަށް އަހަރީ ޗުއްޓީ ދިނުން ވަގުތީ ގޮތުން ހުއްޓާލައިފިއެވެ.
ފުލުހުންގެ މީޑިއާ އޮފިޝަލް ބުނީ އަހަރީ ޗުއްޓީ ދިނުން ހުއްޓާލާފައި ވަނީ ކޮވިޑް-19 ގެ ހާލަތު ގޯސް ވުމާ ގުޅިގެން، ފުލުހުންގެ އޮޕަރޭޝަން ލެވެލް 2 އަށް މަތިކޮށްފައި ވާތީ ކަމަށެވެ.
ނަމަވެސް މުވައްޒަފުންނަށާއި އާއިލާގެ މެންބަރުންނަށް ދިމާވާ އިމަޖަންސީ ކަންކަމާ ގުޅިގެންނާއި ކައިވެނި ކުރުން ފަދަ މުހިންމު ކަންކަމާ ގުޅިގެން މިހާރު ވެސް ޗުއްޓީ ދެމުންދާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ އެ އުސޫލާ ގުޅިގެން އެއްވެސް މުވައްޒަފަކު މިހާތަނަށް ޝަކުވާ ހުށައަޅާފައިނުވާ ކަމަށެވެ.
ކޮވިޑް ކޭސްތައް އިތުރުވުމާ ގުޅިގެން ކޮވިޑުން ރައްކާތެރިވުމަށް ރާއްޖޭގައި އަޅާފައިވާ ފިޔަވަޅުތައް ވަނީ އިތުރަށް ހަރުކަށިކޮށް ވަރުގަދަ ކޮށްފައެވެ. އެ ގޮތުން މާލެ ސަރަަހައްދުގައި އަދިވެސް ކާފިއު ވަގުތެއްގެ ގޮތުގައި ހަމަޖައްސާފައި ވަނީ ރޭގަނޑު 11 އިން ފެށިގެން ފަތިހު 4:30 އާ ދެމެދެވެ. އަދި މާލެ މަގުމަތީގައި އެއްގަމު އުޅަނދު ދުއްވުން މަނާ ވަގުތެއްގެ ގޮތުގައި ހަމަޖައްސާފައި ވަނީ އިރުއޮއްސި 6 އިން ހެނދުނު 6 އާ ދެމެދެވެ.
ހަމައެއާއެކު މާލެ ސަރަހައްދުގައި ޖަމާއަތުގައި ނަމާދުކުރަން ސަފު ހަދާއިރު ގައިދުރުކަން ދަމަހައްޓަން ވަނީ އަންގާފައެވެ. އަދި ސިނަމާތައް ބަންދުކުރުމާއި ދުވުމަށް ހާއްސަ ޓްރެކްތައް ބަންދުކުރުމާއި ޕާކުތަކާއި މައިޒާންތައް ވެސް ވަނީ ބަންދުކޮށްފައެވެ.
