ފުލުހުންގެ ބޯޑަށް އެމްޑީޕީގެ އިންޓަނޭޝަނަލް ސްޕޯކްސް ޕާސަން ހާމިދު އަބްދުލްޣަފޫރު އައްޔަން ކުރަން ފާސްކޮށްފިއެވެ.
ޕޮލިސް ބޯޑަށް ކުރިމަތި ލި ފަސް ފާރާތުގެ ނަން ދިރާސާ ކުރުމަށް ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީއަށް ފޮނުވާ، ރައްޔިތުންގެ މަޖިލީހުގެ 241 ކޮމިޓީގެ މެންބަރުންގެ އަޣުލަބިއްޔަތުން މިހާރު ވަނީ ހާމިދުގެ ނަން ފާސްކޮށްފައެވެ.
ފުލުހުންގެ އާ ގާނޫނުގައިވާ ގޮތުން އާންމުންގެ ތެރެއިން ޕޮލިސް ބޯޑަށް ކުރިމަތިލާ މީހުން ތެރެއިން ބޯޑަށް އައްޔަން ކުރާނެ މީހެއް ކަނޑައަޅާނީ ރައްޔިތުންގެ މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްކުރާ ނަމެކެވެ. އެގޮތުން ދެ ނަމެއް މަޖިލީހުން ކަނޑައަޅަން ޖެހެއެވެ.
ޕޮލިސް ބޯޑަށް ލާން ފޮނުވި ނަންތައް:
- ލަބީގު މުހައްމަދު މާހިރު / މ.މަނަދޫ ވިއު
- ޒުބައިރު އަހުމަދު މަނިކު / ގ.މަލްވިނަ
- ޒީނަތު އަލީ / ދަފްތަރު 2616އަލީ މުހައްމަދު މަނިކު / ދަފްތަރު 1851
- ހާމިދު އަބްދުލްޣަފޫރު / ހ.ޝޭޑީ ކޯނާ
ހާމިދު ގެ ނަން ފާސް ކޮށްފައި ވާއިރު، ޕޮލިސް ބޯޑަށް ލާން ހާމިދުގެ ނަން ފޮނުވުމާ ގުޅިގެން ކުރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ވިދާޅުވީ ފުލުހުންގެ އިދާރާ ރިފޯމް ކުރުމުގެ ނަމުގައި، ހައްޔަރު ކުރި މީހަކު، ފުލުހުންގެ ބޯޑަށް އައްޔަން ކުރުމަކީ އެމުއައްސަސާއަށް ކުރެވޭ ވަރަށް ބޮޑު މަލާމާތެއް ކަމަށެވެ.
ހައިލަމް އެފަދައިން ވިދާޅުވެފައި ވަނީ ހާމިދު އަބްދުލްޣަފޫރަކީ މަސްތުވާތަކެތީގެ މައްސަލައެއްގައި ހައްޔަރު ކުރުމުން ފުލުހުންނަށް ކުޑަކަމުދާތަކެތި ދިނުމަށް ދެކޮޅު ހެއްދެވި ފަރާތަކަށް ވާތީއެވެ. ހައިލަމްގެ އިތުރުން އެތައް ބަޔަކު ވަނީ ހާމިދު، އެ ބޯޑަށް ލާތީ ހިތްހަމަ ނުޖެހުން ފާޅުކޮށް ޝުއޫރު ފާޅުކޮށްފައެވެ.
ހދ. ހޮޑައިދޫގައި މަސްތުވާތަކެތި ބޭނުން ކުރި ކަމުގެ ތުހުމަތަށް ކުޑަކަމުދާ ތަކެތި ނުދީގެން ހާމިދުގެ މައްޗަށް އޭރު ދައުވާ ވެސް ކުރިއެވެ. އެމައްސަލައިގައި އޭނާއަށް ހަ މަސް ދުވަހުގެ ޖަލު ހުކުމެއް އިއްވި ނަމަވެސް ހައިކޯޓުން ވަނީ ފަހުން އެ ހުކުމް ބާތިލް ކޮށްފައެވެ.
ފުލުހުންގެ ބިލަކީ މިދިޔަ އަހަރުގެ ޑިސެމްބަރު މަހުގެ 6 ވީ އާދީއްތަ ދުވަހު ބޭއްވެވި ރައްޔިތުންގެ މަޖިލީހުގެ 2020 ވަނަ އަހަރުގެ ތިންވަނަ ދައުރުގެ 27 ވަނަ ޖަލްސާގައި ފާސްކުރެއްވި ބިލެކެވެ.
އެ ގާނޫނުގައި ފުލުހުންގެ ހިދުމަތް ފޯރުކޮށް ދިނުމުގެ މައިގަނޑު އަސާސްތަކާއި އުސޫލުތަކާއި، ފުލުހުންގެ ހިދުމަތުގެ މައިގަނޑު މަސްއޫލިއްޔަތު ތަކާއި، ބާރުތަކާއި، އެ ހިދުމަތާގުޅޭ އެނޫންވެސް ކަންކަން ބަޔާން ކޮށްފައި ވެއެވެ. އެ ބިލުގެ މަގްސަދުތަކުގެ ތެރޭގައި ދިވެހި ފުލުހުންގެ ހިދުމަތުގެ އެންމެހައި ކަންކަމަކީ ގަނޫނުއަސާސީއާއި، ގަނޫނުއަސާސީގައި ބަޔާން ކޮށްފައިވާ ދުސްތޫރީ ހަމަތަކާއި، އިންސާނީ ހައްގުތަކާއި ކަރާމަތަށް އިހްތިރާމު ކުރުމާއެކު ގާނޫނުގެ ހުކޫމަތުގެ ތެރެއިން ދެވޭ ހިދުމަތެއްކަން ކަށަވަރު ކުރުން ހިމެނެއެވެ.
އަދި ވަކިފަރާތަކަށް ޖެހުމެއް ނެތި، އަދި ވަކި ނުފޫޒަކަށް ލެނބުމެއް ނެތި، ހަމަހަމަކަމާއެކު ގާނޫނު ނަގަހައްޓައި އަދި ތަންފީޒު ކުރުމާއި، އަމަންއާންމާއި، ދާހިލީ ސަލާމަތާއި ރައްކާތެރިކަމާ ގުޅޭގޮތުން ފުލުހުން ކުރަންޖެހޭ ކަންކަން ކުރުމުގެ ގާނޫނީ ބާރާއި އިހްތިޔާރު ފުލުހުންނަށް ފޯރުކޮށްދިނުން ހިމެނެއެވެ.
