މިވަގުތު ރާއްޖޭގައި ކޮވިޑް ޖެހިފައިވާ ފަތުރުވެރިންގެ އަދަދު 200 އިން މައްޗަށް އަރައިފިއެވެ.
ކޮވިޑް ޖެހިފައިވާ 243 ފަތުރުވެރިއަކު ރާއްޖޭގައި ތިބިކަން ޓޫރިޒަމް މިނިސްޓްރީން ނެރުނު ތަފާސްހިސާބު ތަކުން ދައްކައެވެ. އެ ތަފާސްހިސާބު ތަކުން ދައްކާ ގޮތުގައި މިއަހަރު ފެށިގެން މިހާތަނަށް ޖުމްލަ 312 ފަތުރުވެރިއަކު ވަނީ ކޮވިޑަށް ޕޮޒިޓިވް ވެފައެވެ. އަދި މިހާތަނަށް 69 މީހަކު ބަލިން ރަނގަޅު ވިއިރު، 243 މީހުން މިވަގުތު ވެސް ކޮވިޑް އެކްޓިވް ކޭސްގެ ގޮތުގައި އެބަ ތިއްބެވެ.
މިއަހަރު މިހާތަނަށް ރާއްޖެ އަށް 173،483 ފަތުރުވެރިން އައިސްފައި ވާއިރު ކޮވިޑަށް ޕޮޒިޓިވް ވި ނިސްބަތަކީ 0.18 ޕަސަންޓެވެ. އަދި މިވަގުތު ތިބި ޕޮޒިޓިވް މީހުންގެ ނިސްބަތަކީ މިއަހަރު އައި ފަތުރުވެރިންގެ އަދަދާ އަޅާ ބަލާއިރު 0.14 ޕަސަންޓެވެ.
ކޮވިޑުން ރައްކާތެރި ވުމުގެ ފިޔަވަޅެއްގެ ގޮތުން ރާއްޖޭގެ ބޯޑަރު ބަންދު ކުރުމަށް ފަހު އަލުން ހުޅުވާލީ މިދިޔަ އަަހަރުގެ ޖުލައި މަހުގެ 15 ވަނަ ދުވަހެވެ. އެ ދުވަހުން ފެށިގެން ޑިސެމްބަރު 2020ގެ ނިޔަލަށް ރާއްޖެ އައި 169،964 ފަތުރުވެރިންގެ ތެރެއިން ޕޮޒިޓިވް ވީ 224 ފަތުރުވެރިންނެވެ.
މިއަހަރު ރާއްޖެ އައި ފަތުރުވެރިންގެ ތެރެއިން 243 މީހަކު ޕޮޒިޓިވް ވެފައި ވާއިރު، ރާއްޖޭގެ ބައެއް ރިސޯޓުތަކާއި މީހުން އުޅޭ ރަށްރަށުގެ އިތުރުން މާލެ ސަރަހައްދުން ޕޮޒިޓިވް ކޭސް ފެނުން ވަނީ ބޮޑުތަނުން އިތުރުވެފައެވެ. އެގޮތުން ކޮންމެ ދުވަހަކު 100 އިން މަތީގައި ކޭސްތައް ރިޕޯޓް ކުރަމުން ދާތާ މަހަކަށް ވުރެ ގިނަ ދުވަސް ވަނީ ވެފައެވެ.
މިވަގުތު ކޮވިޑް ޖެހިފައިވާ މީހުންގެ އަދަދު 2441 އަށް އަރާފައި ވާއިރު، ކޮވިޑް ޖެހިގެން ހޮސްޕިޓަލުގައި އެޑްމިޓް ކޮށްފައި ވާ މީހުންގެ އަދަދު ވަނީ 162 ގައެވެ. އަދި މި ބަލީގައި މި އަހަރު އެކަނި ވެސް 12 މީހަކު ވަނީ މަރުވެފައެވެ. އޭގެ ތެރެއިން 8 މީހަކު މަރުވެފައި ވަނީ މި ފެބްރުއަރީ މަހުގައެވެ.
