ރޭ މާލޭ މަގުމަތީގައި އަންހެނުން ތަކެއް ހަމަނުޖެހުން ހިންގި މައްސަލައެއް ފުލުހުން ބަލަން ފަށައިފިއެވެ.
ފުލުހުން ބުނީ ހެންވޭރު ބޮޑުފުންގަނޑު މަގުގައި ހަމަނުޖެހުން ހިނގަމުން ދާ ކަމުގެ މައުލޫމާތު ފުލުހުންނަށް ލިބުނީ ރޭ 9:52 ހާއިރު ކަމަށެވެ.
އެ މައްސަލައާ ގުޅިގެން ފުލުހުން އެ ސަރަހައްދަށް ދިޔައިރު ހަމަނުޖެހުން ހިންގި މީހުން އެ ސަރަހައްދު ދޫކޮށް ގޮސްފައިވާ ކަމަށާއި އަދި އެކަމާ ގުޅިގެން އިތުރު މައުލޫމާތު ސާފުކޮށް ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން ބުނެއެވެ.
ސޯޝަލް މީޑިއާގައި ރޭ އާންމުވެފައިވާ ވީޑިއޯއިން ފެންނަ ގޮތުގައި ތިން އަންހެނަކު ގަޔަށް އަތްލައި ޒުވާބު ކުރަމުން ދިޔައިރު އެތަނުން އެކަކު މަގުމައްޗަށް ވައްޓާލާ މަންޒަރުވެސް ފެނެއެވެ. ފިރިހެނަކު އެމީހުންނަށް ހުރަސް އެޅުމުން ފަހުން އެކަކު އަނެކަކުގެ ގަޔަށް އަތް ނުލެވުނު ނަމަވެސް އެމީހުން ވަނީ އެކަކު އަނެކަކަށް ހަޑިހުތުރު ބަހުން މުއާމަލާތް ކޮށްފައި ކަމަށް މައުލޫމަތު ލިބެއެވެ.
