އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރު މިއަދު ރާއްޖެއަށް ކުރައްވާ ދަތުރާ ގުޅިގެން މާލޭގެ ބައެއް ސަރަހައްދުތައް ބަންދުކުރަން ނިންމައިފިއެވެ.
ފުލުހުން ބުނީ ހާއްސަ އިވެންޓަކާ ގުޅިގެން، ޗާޓުގައި (ތިރީގައި) ފާހަގަ ކޮށްފައިވާ ސަރަހައްދުތައް މިއަދު 07:00 އިން ފެށިގެން އިވެންޓް ނިމެންދެން އާންމު ދަތުރުފަތުރަށާއި ހިނގާ ބިނގާވެ އުޅޭ މީހުންނަށް ބަންދު ކުރެވޭނެ ކަމަށެވެ.
އެގޮތުން ޗާޓުގައި ފާހަގަކޮށްފައިވާ ސަރަޙައްދުތަކުގައި މިއަދު 11:59 ގެ ފަހުން އެއްވެސް އުޅަނދެއް ޕާކު ކުރުމަކީ މަނާކަމެއް ކަމަށް ވެސް ފުލުހުން ވަނީ ބުނެފައެވެ.
ފުލުހުން ވަނީ ޕާކު ކޮށްފައިވާ އުޅަނދުތައް މިއަދު 11:59 ގެެ ކުރިން ނެގުމަށް އެދިފައެވެ.
ފޮރިން މިނިސްޓްރީން ބުނީ ޖައިޝަންކަރު ވަޑައިގަންނަވަނީ މިނިސްޓާ އޮފް ފޮރިން އެފެއާޒް އަބްދުﷲ ޝާހިދުގެ ދައުވަތަކަށް ކަމަށެވެ. އޭނާގެ ދަތުރަކީ 2 ދުވަހުގެ ދަތުރެކެވެ.
އެ ދަތުރުގައި ރައީސް އިބްރާހިމް މުހައްމަދު ސޯލިހްގެ އަރިހަށާއި ރައްޔިތުންގެ މަޖިލީހުގެ ރައީސްގެ އަރިހަށް އިހްތިރާމްގެ ޒިޔާރަތެއް ކުރައްވާނެއެވެ. އަދި މިނިސްޓާ އޮފް ފޮރިން އެފެއާޒް އާއި މިނިސްޓާ އޮފް ޑިފެންސްއާ ބައްދަލު ކުރައްވާނެއެވެ.
މީގެ އިތުރުން މިނިސްޓާ އޮފް ފިނޭންސް، މިނިސްޓާ އޮފް އިކޮނޮމިކް ޑިވެލޮޕްމަންޓް އަދި މިނިސްޓާ އޮފް ނޭޝަނަލް ޕްލޭނިންގް، ހައުސިން އެންޑް އިންފްރާސްޓްރަކްޗާ އާއެކު ޖޮއިންޓް މީޓިންގްއެއް ބޭއްވުމަށް ހަމަޖެހިފައިވާ ކަމަށް ފޮރިން މިނިސްޓްރީން ބުނެއެވެ.
މި ދަތުރުގައި އިންޑިއާ އާއި ދިވެހި ރާއްޖެއާ ދެމެދު މުހިންމު އެއްބަސްވުންތަކެއްގައި ސޮއިކުރުމަށް ހަމަޖެހިފައިވާ ކަމަށާއި އިންޑިއާ ސަރުކާރުގެ އެހީގެ ދަށުން ހިންގާ މުހިންމު މަޝްރޫއުތަކެއް އިފްތިތާހު ކުރެއްވުމަށް ހަމަޖެހިފައިވާ ކަމަށް ފޮރިން މިނިސްޓްރީން މައުލޫމާތު ދެއެވެ.
