ގދ. ތިނަދޫ މޮނިޓަރިންގެ ހާލަތުން ނަގައިފިއެވެ.
ތިނަދޫގެ މޮނިޓަރިންގެ ހާލަތު މިއަދު އުވާލާފައި ވާއިރު، އެރަށް މޮނިޓަރިން އަށް ލާފައި ވަނީ މިމަހު 7 ވަނަ ދުވަހެވެ. އެރަށް މޮނިޓަރިންގެ ހާލަތަށް ލާފައި ވަނީ އައްޑޫ ސިޓީގައި އުފެދުނު އޭވިއޭޝަން ކްލަސްޓާއާ ގުޅުން ހުރި މީހަކު އެ ރަށުން ޕޮޒިޓިވް ވުމާ ގުޅިގެންނެވެ. އެގޮތުން އެ ކްލަސްޓާއާ ގުޅުން ހުރި ޖުމްލަ 3 މީހަކު ވަނީ ތިނަދޫން ޕޮޒިޓިވް ވެފައެވެ.
'ދަ ޕްރެސް' އަށް މައުލޫމާތު ދެއްވަމުން އެރަށު ކައުންސިލް ރައީސް އަލީ އަމްޖަދު ބުނީ، އައްޑޫ ކްލަސްޓާއާ ގުޅުން ހުރި 3 މީހަކު އަދި ރެންޑަމްކޮށް ނެގި ސާމްޕަލްތަކުން 7 މީހަކު ކޮވިޑަށް ޕޮޒިޓިވްވި ކަމަށެވެ. ނަމަވެސް މިހާރު ކޮންޓެކްޓް ޓްރޭސިންގެ މަސައްކަތް ނިމި، ކޭސްތަކުގެ ގުޅުން ހޯދިފައިވާ ކަމަށެވެ.
އަމްޖަދު ވިދާޅުވީ އެރަށުގެ މޮނިޓަރިންގެ ހާލަތު އުވާލާފައި ވާއިރު، ރަށުގެ އާންމު ހާލަތު ރަނގަޅު ކަމަށެވެ. އަދި ޕޮޒިޓިވްވެ، އައިސޮލޭޝަނުގައި ތިބި މީހުންގެ ހާލަތު ވެސް ރަނގަޅު ކަމަށް އަމްޖަދު މައުލޫމާތު ދެއްވައެވެ. ތިނަދޫގައި 700 އަށް ވުރެ ރެންޑަމް ސާމްޕަލް ނަގާފައި ވާއިރު، މިހާރު ޕޮޒިޓިވްވެފައިވާ މީހުންގެ އިތުރަށް އިތުރު ބަޔަކަށް ބަލި ޖެހިފައި ނުވާކަން ވަނީ ކަށަވަރު ވެފައެވެ.
ތިނަދޫ މޮނިޓަރިންގެ ހާލަތުގައި އޮންނަތާ 10 ދުވަސް ފަހުން މޮނިޓަރިންގެ ހާލަތު އުވާލާފައި ވާއިރު، މިމަހު 3 ވަނަ ދުވަހު ވެސް އެރަށް މޮނިޓަރިން އަށް ލިއެވެ. އޭރު ދެ ދުވަސް ވަންދެން މޮނިޓަރިންގެ ހާލަތުގައި އޮތީ ޖެންޑާ މިނިސްޓްރީގެ ބަޔަކު ހައްސަ ހުއްދައިގެ ދަށުން އެރަށަށް ދިއުމަށް ފަހު މާލެއައިސް ހެދި ޓެސްޓުން ކޮވިޑަށް ޕޮޒިޓިވް ވެފައި ވުމުންނެވެ. ނަމަވެސް އެ މީހުންގެ ކޮންޓެކްޓް ޓްރޭސިން ހެދުމަށްފަހު 5 ވަނަ ދުވަހު ވަނީ ތިނަދޫ މޮނިޓަރިންގެ ހާލަތުން ނަގާފައެވެ.
